CAUCA, COLOMBIA.-E kantidat di morto despues di un atake ku bomba riba un via importante den zùitwèst di Colombia, a yega 19. Por lo ménos 19 persona a pèrdè nan bida den un atentado ku a pasa djasabra riba un kaminda den zùitwèst di Colombia, segun un balanse nobo publiká djadumingu, ora ku falta un poko mas di un luna pa e elekshonnan presidensial. Den medio di e kampaña elektoral, dominá pa tema di seguridat, outoridatnan a atribuí e atake na disidentenan di e eks gueria FARC ku no a aseptá e akuerdo di pas di 2016. E presidente Gustavo Petro a referí na nan komo “teroristanan” i a ordená pa intensifiká nan persekushon.
Den un informe publiká riba X, Medicina Legal a informá di “diesnuebe kurpa sin bida”. Promé ku esaki, nan a indiká ku e sifra tabata 14 morto i 38 herido komo konsekuensia di e eksploshon grandi ku a pasa djasabra 25 di aprel riba un kaminda den e departamento di Cauca. Segun e ehérsito, e eksploshon a sosodé durante di un kontròl ilegal di e disidentenan kontra poblashon sivil riba kaya.
E bòm a pega kontra mas di dies vehíkulo i a benta nan vários meter, segun testigunan di e atentado. Imágennan ta mustra e kurpanan kubrí di otro víktimanan, vehíkulonan destruí i un krater grandi riba e kaminda. E rebeldenan ta sembrá teror den e region di Cauca, ku un serie di atentado ku a kuminsá djabièrnè ku un atake ku bòm kontra un base militar den e siudat di Cali, ku a laga dos herido. E krísis di seguridat na Colombia ta empeorá despues di un atake nobo ku silinder di bòm den e zùitwèst di e pais. E grupo liderá pa Iván Mordisco, e kriminal mas buská di Colombia, ta kastigá e pueblo ku eksplosivonan, dron i tiroteo.
Despues di su yegada na poder na 2022, presidente Petro a trata sin éksito pa negoshá pas ku e organisashonnan armá mas grandi, ku a fortalesé nan organisashonnan den e último añanan.
