MAJIYA, NIGERIA (AFP).- Por lo ménos 150 persona a muri djamars anochi na Nigeria na momento ku un trùk di gasolin a eksplotá despues di un aksidente. E gran mayoria di esnan ku a pèrdè nan bida a yega te serka dje trùk pa purba yena blekinan ku gasolin.
Vários testigu a deskribí un “esena di teror” ku un eksploshon enorme, ku sekòndenan su tras hopi hende na vlam di kandela tabata kore i grita.
E trùk a aksidentá riba un kaminda dje estado di Jigawa, den nort di Nigeria, ora ku el a purba na evitá un choke ku otro vehíkulo.
E studiante Sanusi Lawan a splika ku prome el a tende “gritunan di legria” i el a kore bai den un grupo di sigur shen hende ku tabata yena gasolin den bleki ku bòter.
E hóben di 21 aña a hiba su bòter kas kaminda su ruman a konvensé pa no bolbe bai na e sitio. Tabata na e momento ei ku el a tende un “eksploshon enorme”. “Hendenan tabata kore pegá na kandela i tabata grita pidiendo yudansa”, segun el a agregá.
E bosero di polis, Lawan Shiisu Adam, a splika ku polis a yega na e sitio na momento ku e situashon a sali kompleto for di man. E agensia nashonal di emergensia a bisa ku 147 persona a muri den e tragedia.
Hambali Zarga, presidente dje distrito di Taura, a bisa na AFP ku e sifra ei ta referí na solamente e kurpanan kimá ku nan a hinka huntu den un buraku. Pues e ta kere ku e kantidat di víktima ta muchu mas grandi.
Hopi dje víktimanan a kima di tal manera ku no por a rekonosé nan. Ademas dje mortonan, tambe a konta 140 herido ku a keda tratá den hòspitalnan dje siudat.
Hopi eksploshon
Eksploshon di trùknan di gasolin ta tuma lugá ku regularidat na Nigeria, e pais mas poblá di Afrika, kaminda ku kareteranan ta den mal kondishon i e poblashon ta mira kiko nan por kue na momento di kualke aksidente.
Nigeria ta sufri un krísis ekonómiko ku un inflashon di 32.7% den sèptèmber último i e tarifa di gasolin a multipliká pa sinku for di despues ku aña pasá e presidente Bola Ahmed Tinubu a kòrta den supsidionan.
Na Nigeria, un dje mayor produktornan di krudo di Afrika, tambe ta registrá kandela i eksploshon mortal den e infrastruktura di refineria i distribushon di kombustibel.
