DAMASKO, AP.- Por lo ménos shete persona a muri, inkluyendo tres mucha, i vários mas a resultá heridá miéntras ku e sifra ta sigui subi debí na un eksploshon na man di insurgentenan den e partinan ku ta pertenesé na gobièrnu di Alepo, asina televishon estatal a informá ayera.
E opservatorio sirio di derechinan humano ku sede na Gran Bretaña, ku tin un ret di aktivista na Siria a bisa ku por lo ménos 38 sivil, inkluyendo 14 mucha a muri for di despues ku insurgentenan a kuminsá atakenan na Alepo djabièrnè pasá. Televishon estatal a bisa ku e mortonan ta repartí den 4 distrito. Ayera djadumingu tabata e di tres dia di atakenan di insurgentenan ku ke kibra e poder di gobièrnu den e distritonan di Alepo ku ta den poder di rebeldenan. Prensa a bisa ayera ku gruponan insurgente a usa un gas tóksiko pa ataká al Hamadaniye.
E agensia di notisia ofisial Sana a bisa ku 35 persona a sufri problema ku halamentu di rosea. Televishon a mustra dòkternan i paramédikonan ku máskara introdusiendo hende den hospital. Un habitante a grita den kámara “Nos no ke mas tregua, nos ke solushon militar, no mas tregua”.
Rusia i e gobièrnu sirio a para ku nan atakenan aéreo riba e parti di Alepo aki for di siman pasá pa asina permití evakuashon di heridonan i sivilnan. Pero no por a evakuá niun hende i e esfuersonan pa hiba remedi i kuminda pa e zona afektá tabata masha poko. Forsanan gubernamental ta mantené nan ofensivo na tera.
