NEW YORK, AP.- Algun ratu promé ku el a wòrdu sentensia na kadena perpetuo, Joaquin “El Chapo” Guzman a probechá di e momentu pa dirigí su delaster palabranan na mundu.
E narkotrafikante mehikano a splika djárason ku el a sufri “tortura” durante 30 luna den prizòn na Merka. El a agregá ku e hues ku a atendé su kaso a ignorá akusashonnan di mal kondukta ku vários miembro di hurado a demostrá durante su huisio.
“Mi huisio a wòrdu mancha i no tabata hustu”, asina Guzman a bisa na hues Brian Cogan.
“Merka no ta mas mihó ku otro paisnan korupto”, asina el a indiká.
Cogan a kondena El Chapo algun minüt despues na bida largu den prizòn. Esaki ta un final humiante pa un hefe kriminal konosí pa su kapasidat di liberá su mes usando violensia, asesinato, soborno òf tùnelnan ilegal.
E kapo di 62 aña, protehá pa un ehérsito di Sicario na México i un ret kompliká di korupshon, a wòrdu ekstraditá pa Merka pa presensia su huisio despues di a skapa dos biaha for di prizòn na México.
