NEW DELHI, AP.- Por lo ménos kuater persona a muri den konfrontashonnan djaweps riba e promé dia di elekshon general na India, un proseso di seis siman kual ta wòrdu konsiderá komo un referèndem riba e promé minister Narendra Modi i su partido hindú nashonalista Bharatiya Janata, segun informashon di outoridat djaweps.
Polis a bisa ku dos trahadó di e partido gobernante di estado di Andhra Pradesh, Telugu Desam, a muri den un konfrontashon ku partidarionan di un partido regional di oposishon, Kongreso YSR. Un funshonario elektoral a muri den un atake pa insurgentenan na nortost di India, segun indikashon di e komishon elektoral.
Tabatin konfrontashonnan violento den otro partinan di estado di Andhra Pradesh kaminda votadónan lo skohe 25 miembro di kámara di Parlamento di India i 175 asiento den asamblea estatal. Un otro persona a muri na man di forsa di gobièrnu durante un protesta na Cachemira.
E partisipashon a wòrdu kalkulá na mas di 60% di e votadónan, mayoria hòmber i muhé bisti ku kolónan alegre a akudí e sentronan di votamentu fuertemente protehá. Ta trata di e ehersisio demokrátiko mas grandi na mundu, den un pais ku 1.300 mion persona.
