Ellery Gustina Fraay a check in, baha fo’i barku bèk i haña aksidente

WILLEMSTAD.- E hóben víktima maskulino ku tabata envolví den e aksidente di tráfiko ku a tuma lugá djaluna 8 di òktober último riba Pater Eeuwensweg ku a fayesé, a keda identifiká komo: Ellery Fabian Gustina Fraay, nasé na Kòrsou 24 di ougùstùs 1995.

Djaluna último, e hóben huntu ku su mama i demas famia a check in riba e barku Pulmantur pa asina por bai gosa di algun dia di vakashon den famia.

Despues ku e hóben a kaba di check in ku su mama, e lo mester a baha bèk pa a bai hasi algu sin su mayor sa.

Riba ruta pa regresá bèk, e hóben huntu ku dos amigu di dje a pèrdè kontròl i aksidentá di un forma violento.

E hóben víktima ku a pèrdè su bida a pidi e amigunan pa e mes stür riba ruta bèk pa barku mirando ku e tabata basta lat i kasi barku tabata bai sali.

For di loke EXTRA por a komprondé, e hóben a bai kas bin bèk ku su dos amigunan pa asina e por a bai kue su wega di playstation pa por subi barku bèk.

Despues ku nan a aksidentá, ku yudansa di tim di reskate a kòrta e vehíkulo pa saka un di e víktimanan ku a keda pegá den e vehíkulo.

Tantu e shofùr komo e okupantenan a resultá seriamente heridá i a keda transportá ku urgensia pa departamento di emergensia pa tratamentu médiko avansá.

Mas lat a drenta e informashon ku e hóben shofùr a pèrdè su bida.

Na momentu ku a bai informá e mama, el a indiká ku no ta su yu, debí ku e yu a check in huntu kuné.

Pero e momentu ei ya no por a hasi nada mirando ku barku ya a sali.

Ta te na momentu ku e barku a yega Boneiru, e famia por a baha i kue un avion rumbo pa Kòrsou bèk.

Di parti di EXTRA, forsa ta bai na famianan ku a keda atras.

 

SHARE

LEAVE A REPLY