WASHINGTON, USA.- E multimionario Elon Musk den último lunanan a hasi un donashon di 75 mion dollar na e kampaña presidensial di Donald Trump, segun sifranan ofisial ku a konfirmá ku e empresario a pusta “tur kos òf nada” pa e eks presidente republikano.
E doño di Tesla, SpaceX i X (ántes Twitter) a aportá ku 15 mion dollar den yüli, 30 mion dollar den ougùstùs i otro 30 mion den sèptèmber na e grupo America PAC, su organisashon polítiko di apoyo na Trump, segun datonan di Komishon Elektoral di Merka (FEC).
Na inisio di òktober durante di un reunion di kampaña dje eks presidente, Musk a subi esenario i a deklará di ta dispuesto na asumí un puesto den gobièrnu si Trump keda eligí.
E magnate inkluso a anunsiá djamars anochi riba X ku lo e hasi kampaña den e estado klave di Pennsylvania den próksimo dianan.
E organisashon America PAC, segun Washington Post, ta rekoré estadonan klave, ta bishitá porta pa porta en bes di anunsionan pa konvensé votadónan pa vota pa Trump i no pa e demokrat Kamala Harris.
Tambe el a primintí na paga 47 dollar na esnan ku logra ku un votadó den un estado di ‘swing voters’ firma un petishon na fabor di libertat di ekspreshon i pa karga arma di kandela. “Sèn fásil”, segun Musk a skirbi riba X.
Na final di sèptèmber, su fondo polítiko tabatin 40 mion dollar disponibel, segun datonan di FEC.
E empresario na vários okashon a ripití e retórika agresivo di Trump, inkluso su diskurso di ku migrantenan ta menasá demokrasia norteamerikano.
Te ku ayera, mas di sinku mion norteamerikano a vota di forma adelantá pa e elekshonnan di 5 di novèmber, di kua enkuestanan ta antisipá un pelea pèrtá entre Trump i Harris.
