WILLEMSTAD.- Ayera sra. Emmilou Capriels a huramentá komo parlamentario pa partido PAR ayera. Esaki despues ku for di 11 di yanüari, oposishon no tabata forma kuórem p’asina por a trata kredensialnan di Capriels den un reunion públiko i ku e por drenta parlamento despues ku Jeser El Ayoubi a entrega su retiro i na partido PAR i a entrega su asiento bek na e Tolda Hel.
Den deklarashon na prensa, sra. Capriles a bisa despues di algun siman largu di warda, ayera e dia a yega. E sentimentu ku e tin pa ku e dia aki ta unu miksto, pasombra e ta forma parti di e kolegio di mas haltu di pais Kòrsou, pero di otro banda p’e drenta den parlamento esaki mester a bai den forma di un “aanwijzing”. E ta kontentu ku parlamento ofisialmente tin 21 miembro i parlamento por sigui traha.
Mas aleu Capriles a bisa di ta kontentu ku a yega na final di e proseso p’e huramentá ante di gobernadó interino sra. Michelle Russel-Capriles. “Awor aki ta trabou tin, p’esei despues di a huramentá awe trai mèrdia, mesora mi ta bai parlamento pa wak e leinan ku tin pendiente pa keda trata i kiko tin pa hasi i prepará ya ku djaluna mes tin reunion’.
E kandidato ku a kaba di huramentá a bisa di lo enfoká riba leinan ku tin pendiente pa keda trata.
Capriles a indiká ku e tin 3 aña den gabinete di ministerio di VVRP. E tin un bista kaba riba maneho di gobièrnu i awor ku e tin e funshon di kontròl riba trabou di gobièrnu, e trabounan ta bai bira mas fásil.
E lo ke bai akapará i focus riba hustisia i finansa.
Naturalmente promé minister, i lider polítiko di partido PAR, sr. Eugene Rhuggenaath tambe tabata presente durante di huramentashon di Capriles.
Sr. Rhuggenaath a deklará ku awor tin un Staten i por sigui traha ku leinan ku falta manera e OZB ku ta baha e tarifa di belasting pa komunidat kual ta importante pa Kòrsou den periodo di krísis. Tambe ta importante pa parlamento ta funshoná, pasobra gobièrnu tin di bolbe aserka Staten pa otro dekreto dje situashon di emergensia relashoná ku covid-19. Otro lei pa atendé kuné pa e ahuste di salario di minister i parlamentarionan ku e redukshon di 25% di nan salario. Komo gobièrnu a papia di esaki, pero e no tabata regla den lei i awor mester hasi esaki, segun promé minister Rhuggenaath kende a mustra riba e leinan pendiente pa keda atendé último dianan aki.

LAGA UN KOMENTARIO

Please enter your comment!
Please enter your name here