Fig Tree Training Institute a publiká resientemente un Booklet na papiamentu “Tristesa i rekuperashon, kon pa biba na pas ku pèrdida”. E pandemia di COVID-19 ku nos ta bibando den dje a eksihí hopi bida. Famianan a keda atras den sufrimentu pa pèrdida di un ser kerí, nan ta sufri ku salú, pèrdida di trabou, oportunidatnan. For di 2017 a lanta Fig Tree Training and Institute. Zjumira Wout i Caroline van Romondt a duna un splikashon di nan trabou i kiko e workshop ku nan ta ofresé ta kontené.

Un soño…

Caroline van Romondt ta sikólogo kristian i a splika ku Fig Tree Training Institute a lanta a base di un soño ku e tin for di 2016. E ta konsehero i sikólogo kristian i ora Caroline a bin for di Canada kaminda el a studia. Na 1993 el a bin bèk i e trabounan i nesesidatnan tabata asina grandi ku el a realisá ku hendenan mester ta mas ekipá. I esaki mas den direkshon di kristiannan. Caroline a splika ku iglesia mester ta esun ku ta duna no solamente palabra, pero e palabra den akshon. E palabra ku por internalisá, por usa pa sanashon i pa trata problemanan. Loke ta pasa ta ku hopi hende ta usa e palabra pero no sa kon pa bai un tiki mas profundo kuné. E parti di sikólogo ku ta bin for di Dios, kende a siña nos pa konektá i bai mas profundo, i asina pa e problemanan por keda tratá na un manera ku Dios ta esun ku ta sana. Pero kon por yega einan? Komo profeshonal, Caroline a pensa ku hendenan mester ta mas ekipá pa trata tur e otronan ku ta drentando iglesia, buskando un manera pa sobrebibí, buskando un manera pa keda saná, buskando un manera pa haña alivio. Hopi hende ta buskando un manera pa sinti pas, pa haña goso òf pa haña bida. Nan ta sinti nan mes morto.

Ekipá hende…

E instituto Fig Tree a lanta na 2017. Caroline ta mishonero ku Mission Go, i teniendo na kuenta ku su vishon pa ekipá hendenan, pa e hendenan mes por sa kon trata echonan ku ta drentando, a kuminsá ku Fig Tree pa duna tayernan di trabou. Ta trata echonan ku ta drentando manera depreshon, kon ta trata ku tristesa, kon ta trata ku un persona adikto, un persona ku tin problema mental. I esnan yamá pa e ministerio mester tin maske ta algu. No ta asina ku ta eksihí pa nan ta konseheronan profeshonal òf sikólogo i asta no sikiater, ounke lo ta bon si por haña algun ta bai den e direkshon ei si, pero nan ke e hendenan kue e bukinan pa nan mes, pa nan studia kiko ta depreshon, kon ta trata kuné, kon ta trata ku tristesa. I ora abo pasa dor di dje bo sa kon pa yuda otro, segun Caroline.

Caroline van Romondt


Un produkto internashonal…

Caroline a sigui splika ku aki no ta trata di un produkto di dje ni di Zjumira pero nan ta partner ku un ministerio internashonal Hope for the Heart Ministry ku su fundadó June Hunt. E sikiater klíniko ku ta e CEO di e ministerio ta hasi hopi di e videonan i tayernan huntu ku e otro profeshonalnan kristian. Asina nan ta partner ku nan i e promé partner internashonal por sierto. Asina ta haña material na Kòrsou i asina tambe ta outorisashon pa por tradusí e buki ku ta ofresé. Nan ta asina profundo profeshonal i bíbliko ku aki na Kòrsou nan ta sinti orguyoso di por partner ku Hope for Heart Ministry. Ya tabatin diferente workshop kaba. I e tayernan aki ta hasi un diferensia den hende su bida. Tur ku a tuma e tayernan aki, ke mas. E plan ta pa sigui duna e tayernan.

 

For di e punto di bista kristian…

Tin un diferensia di e forma ku ta trata un hende for di e punto di bista kristian. Segun Caroline van Romondt, den su bista, e parti bíbliko ta bai mas profundo. Pasobra bo ke wòrdu libra, Hesus ta bisa ku e ta e kaminda i e bèrdat i e bida. E bèrdat ta hasi bu liber. Liberashon solamente den Hesus nos por ta. Copping Mechanism ta simplemente esei. E ta un manera, un strategia pa sobrebibí. Un Kristian ku tin bida, pasobra Hesus a bin pa duna bida na abundansia, Hesus no a bin pa bisa ku e ke pa sa kon pa sobrebibí. Dios a krea nos pa un libertat, un relashon asina íntimo ku nos por gosa di bida na abundansia. Copping Mechanism ta un regalo di Dios. Un mucha no sa kon pa dil ku trouma i krísis i Dios ta permití pa un hende haña un mekanismo pa sa kon pa atendé ku e problema ku kisas e mucha ei ta konfrontando. Esei ta e diferensia entre e sikólogo kristian i e otro. Caroline a bisa ku esaki no tin nada di aber ku religion pero e tin di aber ku e palabra di Dios ku ta bira bibu.

Zjumira Wout

Fig Tree ke siña hende, nan tin e fuentenan pa yuda e hende pa e pasa dor di e depreshon, e tristesa, e abuso, e trouma. E instituto a keda lantá pa ekipá e kristian ku ke yuda otro. Ta dependé e tayer ku ta duna, ta dependé e edat ku e ta dirigí na dje.  E tayernan ta mas pa adulto esta 18 aña bai ariba. Pa tuma parti na e tayer e persona no mester tin un sierto estudio.

 

Tayernan…

E tayernan segun Zjumira, nan tabatin 3 kaba. Tin unu planiá dia 13 di yüni. E promé tayer ku nan a hasi tabata presensial pasobra e tabata nèt promé ku e ‘lockdown’. E dos último tayernan a bai via Zoom. Nan wèpsait ta Figtreetraining.org , riba kual ta pone e manual. Ta duna e hendenan un periodo di tempu riba nan propio tempu pa wak video, download e manual, wak i bolbe wak i djadumingu 13 di yüni anochi nan ta bin huntu i ta kontesta tur posibel pregunta i duna tepnan. Ta kobra 25 florin pa e tayernan i e ta inkluí tur kos, esta video, manual, ‘fact sheets’ i e sekshon di Zoom ku Caroline ku ta konsehá i guia duna teps.

 

Yuda bo mes i otronan…

Nan deseo i vishon ta pa mas hende por benefisiá. Loke ta duna den e tayernan ta kosnan ku normalmente lo paga masha hopi sèn pe.  Caroline a bisa ku nan no ke pone peso finansiero riba hende i p’esei e preis ku nan ta kobra ta asina abou. E loke nan ta kobra no ta kubri nan gastunan. Esun ku sigui e tayernan ta yuda nan mes i ta ekipá pa yuda otronan. Tambe tin e buki na benta. E buki aki ta bai muchu mas profundo. E buki ta 40 página. Caroline i Zjumira ta enkurashá e hendenan pa studia e tópikonan den e buki. E buki ta na benta na Kas di Beibel i ta kosta fls 15. Tambe lo pone den otro librerianan. Of tambe por manda WhatsApp na 5285090 tin Facebook página Fig Tree training.

 

Dil ku doló…

Hopi bia ora bo no dil i lamentá na un manera drechi, bo ta keda pegá. I esaki ta afektá tur bo relashonnan segun Caroline. Ta importante pa rekonosé e situashon. Rekonosé ku mester dil ku e situashon. Den nos kultura ora un hende ta yora, ta bis’é pa e stòp di yora. Pero mester laga e hende pasa dor di su doló, yora su doló, dil ku su tristesa. I p’esei Fig Tree ke ekipá hende kon pa dil ku pèrdida, sinti e doló pa e por kura.

Kada hende tin nan proseso di rou…

Kada hende tin nan manera di prosesá tristesa, hopi bia nos ke kura un hende pero tin hende ta pasa 3 luna otro 6 luna i otro 1 aña i mas. Mester respetá e otro su proseso di lamentá i proseso di rou.  Kada hende ta otro i esei por haña bèk den e buki.

 

 

 

 

 

LAGA UN KOMENTARIO

Please enter your comment!
Please enter your name here