MIAMI, USA (AFP).- Empresa gigante di bakoba Chiquito Brands International, deklará responsabel di parti di un hurado na Merka di ta finansiá e grupo paramilitar Autodefensas Unidas de Colombia (AUC), a anunsiá di lo apelá e kaso.
“Ounke nos ta desepshoná pa e sentensia, ketu bai nos tin konfiansa ku nos posishon legal lo prevalesé”, segun e kompania norteamerikano den un komunikado.
Den su veredikto di djaluna último, un hurado di Florida a ordená Chiquita pa indemnisá ku un suma di 38.3 mion e famianan di ocho persona asesiná pa AUC, responsabel pa algun shen morto den e pais suramerikano.
“Nos klientenan ta riska nan bida pa presentá pa pidi pa Chiquita para responsabel, poniendo nan fé den e sistema di hustisia di Merka”, segun Agnieszka Fryszman, un dje abogadonan dje demandantenan.
“E veredikto lo no trese bèk e kasá i yunan ku a keda asesiná, pero ta trese klaridat i ta pone e responsabilidat dje finansiamentu di terorismo kaminda e mester ta: serka Chiquita”, segun ta bisa den un nota.
E gigante di bakoba ya a konfesá den 2007 dilanti tribunalnan merikano di a finansiá AUC -organisashon konsiderá pa Merka komo terorista entre 1997 i 2004 i komo tal pa apoyá esaki ta un delito federal.
Na e okashon ei e kompania a risibí un multa di 25 mion dollar. Pero e empresa ta bisa di tabata víktima di ekstorshon ora ku a paga e sèn na e grupo paramilitar i ku el a hasi esei pa protehá su personal i instalashonnan den e region di Urabá, den nortwèst di Colombia.
