Un barku di karga i un ‘touwboot’ ta pasa via di Cocoli Locks den Kanal di Panamá. Bou di preshon di presidente di Merka, e kompania Hutchison (di Hong Kong) a anunsiá di ta bende su propiedatnan den Kanal di Panamá na kompanianan norteamerikano.
HONG KONG, China.- Bou di preshon fuerte di presidente di Merka, Donald Trump, e empresa Hutchinson di Hong Kong a anunsiá di a yega na un akuerdo pa e bende su partisipashon den e operashon dje Kanal di Panamá i otro instalashonnan di haf na un konsorsio norteamerikano.
CK Hutchinson Holdings lo bende 90% di su akshonnan den Panam Ports Company (PPC) i algun otro haf na un grupo liderá pa e gigante BlackRock pa 19.000 mion dòler, segun un komunikado konhunto.
Hutchinson ta doño i ta operá e hafnan di Balboa i Cristobal den e ekstremonan Pasífiko i Atlántiko dje kanal ku ta konektá dos oséano ku otro.
E benta di PPC “lo tuma lugá di forma separá na momento ku gobièrnu di Panamá konfirmá e términonan proponé pa e kompra i benta”, segun ta bisa den un komunikado.
For di momento di asumí poder dia 20 di yanüari, Trump a denunsiá e supuesto kòntròl di Kanal di Panamá di parti di China.
Trump inkluso a menasá di tuma bèk e kòntròl dje via entre dos oséano, kousando protesta den e pais sentroamerikano.
For di aña 2000, “Autoridad del Canal de Panamá”, un agensia di gobièrnu, ta manehá i a modernisá ku éksito e vianan pa barku, di mas ku un siglo bieu, pa permití e pase di barkunan kada bes mas grandi.
Komo 5% di komèrsio mundial ta pasa via dje kanal.
