Kubanonan ta den un lucha diario i esaki ta konta tambe pa negoshinan, manera e restorant bisto riba e potrèt ku mester hasi uso di karbon pa por kushiná, miéntras ku apénas nan tin koriente durante di algun ora pa dia.
LA HABANA, Cuba (AFP).- Vários empresa strañero a redusí òf te hasta stòp nan operashonnan na Cuba i esaki bou di preshon di Merka pa evitá di keda eksponé na sanshon. E operashonnan di pago ku tarhetanan Visa i Mastercard lo keda suspendé den e pais kuminsando 6 di yüni despues ku un banko a kibra relashon ku Fincimex, entidat finansiero ku tin relashon ku Gaesa i ku ta enkargá pa prosesá e tipo di transakshon na e isla.
Na Cuba, kaminda e poblashon no ta kobra salario den dòler, e tarhetanan aki ta keda usá prinsipalmente pa empresanan strañero, turistanan i kubanonan ku dòbel nashonalidat òf ku ta biba den eksterior, pa paga pa servisionan den komèrsio, restorant, pòmpnan di gasolin i hotèlnan.
E kadenanan ekstranhero, ku a yega e isla den dékada di 1990, ta operá bou di dos skema: mediante e sistema di hotèlnan den asosiashon ku Ministerio di Turismo òf via di akuerdonan di atministrashon ku Gaviota, entidat di Gaesa, ku ta konsentrá desénas di negoshi di nivel haltu.
E kompanianan spañó Iberostar i Melia a stòp di atendé ku 15 i 12 hotèl ku ta keda relashoná ku e aparato militar dje pais, aunke lo mantené operashon dje establesimentunan ku ta keda atministrá huntu ku Ministerio di Turismo. Di su parti, e kanades Blue Diamond a anunsiá su salida total dje merkado kubano. Meimei di un skarsedat severo di kombustibel den e pais, vários hotèl ya a sera.
E kompania di barkunan franses CMA CGM i esun aleman Hapag-Lloyd a suspendé “temporalmente” for di medio mei e entrega i mandamentu di kònteinernan pa Cuba. Aunke e transporte marítimo no ta figurá den e dekreto presidensial norteamerikano di 1e di mei, tur dos kompania por keda eksponé na sanshonnan pa motibu di ta operá den e haf di Mariel, situá na 50 km. di e kapital La Habana.
