VENEZUELA, AFP.- E empresario kolombiano hopi yega na presidente di Venezuela Nicolas Maduro a presentá ayera dilanti di wes merikano na Miami, ku a notifik’é ku e ta akusá pa labamentu di plaka, despues ku el a keda ekstraditá djasabra pasa for di Cabo Verde.
“Bo ta aki nan inisialmente akusá di konspirashon pa kometé labamentu di plaka i tambe shete otro akusashon di labamentu di instrumentonan monetario”, asina e wes John J.O’Sullivan di korte federal di distrito di Florida a trese dilanti durante di un oudiensia ku a tuma lugá via di konferensia di video.
Hustisia merikano ta akusá e empresario di 49 aña i su sosio Alvaro Pulido kende su paradero no ta konosí, di dirigí un fret amplio ku tabata desviá fondonan di un sistema di supsidio pa alimentashon na Venezuela.
Segun Washington, tur dos a transferí 350 mion dòler for di e pais suramerikano pa kuentanan di kontrabanda na Merka i otro pais.
Si nan kulpabilidat keda konfirmá, nan ta enfrentá kastigunan di te asta 20 aña di prisòn. Saab ta prezu na Cabo Verde for di yüni 2020 durante un eskala na e isla nort ost di Afrika, riba petishon di Merka. Na yüli 2019 fiskalnan federal na Miami a akus’é huntu ku Pulido, un siudadano kolombiano di 55 aña di labamentu di plaka. E próksimo oudiensia di Saab lo ta dia promé di novèmber próksimo.
