WILLEMSTAD.- Artista di Kòrsou, Endo Collinz, ta kla pa habri porta di su mundu nobo ku lansamentu di su álbùm: PARAIZO, ku a sali ofisialmente djabièrnè, 4 di sèptèmber, 2026, riba tur plataforma digital.
PARAIZO ta un proyekto ku ta pone kultura, energia i estilo di bida Karibense den sentro. Ku un kombinashon di ritmo Afro-Karibense, pop moderno, melodia tropikal i e propio estilo di Endo, e álbùm ta presentá un zonido ku ta sinti familiar, pero na mes momento fresku i internashonal.
E nòmber PARAIZO ta representá mas ku solamente un destinashon. Pa Endo, Paraizo ta un sintimentu: solo, laman, libertat, amor, amistat, fiesta i e momentunan simpel ku ta hasi bida dushi.
E álbùm ta invitá hende pa laga strès atras, disfrutá di e momentu i drenta den un mundu kaminda bida ta sinti un tiki mas liber.
Den e dianan promé ku lansamentu, Endo ya a duna su públiko un promé sabor di e proyekto ku kantikanan manera “Di Bo So”, “Pegadito”, “Cloud 9” i “Bon Bon” ku a mustra diferente banda di e zonido ku por warda riba PARAIZO.
Pero e álbùm kompletu ta bai mas leu, ku kantikanan ku ta move entre romanse, energia, deseo, bon vibra i momentunan mas personal.
Komo artista di Kòrsou, Endo Collinz ta konsiderá su orígen un parti importante di su identidat musikal. Su meta no ta solamente pa hasi músika for di Karibe, sino pa laga e Karibe mes por wòrdu sintí den su músika. E idiomanan ingles ku papiamentu, ritmonan i ambiente tropikal, i e manera di biba di nos region ta forma parti di e mundu ku e ta krea komo artista.
Ku PARAIZO, Endo ke sigui demostrá ku un artista di un isla chikí por pensa grandi, mantené su propio identidat i na mes momentu krea músika ku por konektá ku hende di Kòrsou i pafó di nos frontera.
E proyekto tambe ta marka un kapítulo nobo den e desaroyo di Endo Collinz komo artista. No solamente musikalmente, pero tambe visualmente. PARAIZO ta bin ku un identidat propio, inspirá pa bida di isla: palmanan, solo, laman, anochi kaloroso, koló, moda i e libertat ku ta karakterisá e Karibe.
Pa Endo, e álbùm ta un invitashon pa mundu mira Kòrsou i Karibe for di un perspektiva moderno. Un lugá ku tin su propio historia, su propio kultura, pero tambe artista ku ta kla pa forma parti di e panorama musikal internashonal.
“PARAIZO ta e sintimentu di amor i libertat ku mi ke duna hende ora nan tende mi músika. Mi ke pa bo por pone e álbùm, bai den bo outo pa ruta di banda bou, i lubidá e bida normal pa djis un ratu. Pa bo sinti ku bo ta den bo propio paraizo.” – Endo Collinz
PARAIZO ta disponibel ofisialmente for di 4 di sèptèmber, 2026 riba Spotify, Apple Music, YouTube i otro plataforma digital.
E lansamentu di e álbùm ta solamente e kuminsamentu di e siguiente kapítulo. Visuals, kontenido nobo, presentashonnan i mas sorpresa rondó di PARAIZO lo sigui despues.
