Dra Yuliana Mendivil;
Nos djentenan i kuido bokal ta hopi importante. Su kuido por evitá malesa i tambe su kuido por sòru pa sierto malesanan no afektá nan. Yuliana Mendivil dentista i ko propietario di Curaçao Dental Center den un entrevista amplio ta duna nos splikashon kiko pa tene kuenta kuné. E entrevista di dr Yuliana Mendivil lo ta den korant i riba nos plataforma digital. Awe nos tin e promé parti kaminda e ta papia di kuido di djente.
Estudio na Colombia
Yuliana ta di Colombia kaminda el a studia e profeshon di dentista durante di 5 aña. Pero su lasonan ku Kòrsou ta bai muchu mas leu, su mama a bin Kòrsou 30 aña pasá i p’esei ora el a terminá su estudio pa e ta un tiki serka su mama, el a bin Kòrsou. For di chikí e tabata bin Kòrsou kontinuamente. Odontologia ta su pashon. Esei e no a sali kuné for di kas ni tin un ke otro famia den e ramo ei pero e ta konsider’é algu di Dios ku a pone den su mente e arte ei. I asina el a bai studia pa dentista. Su mama semper su deseo ta pa nan ta profeshonal, den kual sea e área ku nan ta.
Kòntròl di djente
Kuido di djente ta masha importante. Awor aki tin hopi estudio relashoná ku e parti bokal i sierto malesanan. Por ehèmpel diabétis tin sierto faktornan ku ta hasi e enfermedat aki por kousa daño na e djente. Ku esaki el a splika ku estudio ta focus pa mustra den tur dos banda ta afektá otro esta e diabétis ta afektá e djente i e djente ta afektá e diabétis. I p’esei kòntròl di djente ta masha importante. Mantené djente limpi pa evitá ku un di e bandanan por hasi efekto riba e otro.
For di 6 – 7 luna ban dentista ku e yu
For di ki momentu mester kuminsá paga tinu na nos djente. Pa dra Yuliana, enrealidat for di momentu ku e mama ta na estado mester prepar’é. Komo e no tin konosementu den e tema aki, hende ta kere ku ora e yu tin djente òf ora e tin su djentenan permanente, e ora ei ta pone atenshon na dje. Pero esaki no ta asina, E ta bisa ku dor di ora e yu tin 6 luna ku su dos djentenan dilanti ta bon pa bai dentista. E dentista por duna tep pa kiko hasi òf no. Tin mucha ta bai mas fásil ku por laga su mayornan tene su djentenan limpi pero si e no ta bai, e dentista tei pa duna konsehonan kon pa si logra esei. For di 6 pa 7 luna ta ideal pa bai ku e yu dentista. E no por sinta su so den e stul di dentista pero e ta sinta riba skochi di su mama i kuminsá familiarisá su mes ku tur kos. E ta wak e lus i spil i familiarisá i ora e ta grandi e por bai mas fásil. I p’esei ta importante pa bai ku e yu dentista pa kòntròl. Esaki ta krea un konekshon ku e pashènt ku e ta wak e dentista komo un amigu, un persona ku ta yud’e i no ta krea e espektativa negativo i asina ta bai mas fásil pa e parti di prevenshon. Tratamentu pa mucha tin bia ta poko doloroso i p’esei ta bon pa prevení tur loke ku por.
I ora nos ta bai laga djente, mester yena e skeiru ku pasta di djente? Esei tambe Dentista Yuliana a splika ku no ta e kaso. Segun su splikashon tin diferente kaso. Si ta un pashènt ku tur su djentenan ta importante na promé lugá pa;
Skeiru kabes chikí
Tin skeiru di kabes chikí pasobra e skeiru mester yega te patras di e djentenan. Ku skeiru ku kabes grandi e no ta bai fásil i asina e djentenan patras no ta keda limpi.
Skeiru di djente Sòft
Tin pashènt ke skeiru duru, medium pa e sintié, pero esei no por, no daña bo djente. E karni di djente ta sufri un agreshon asina i e karni di djente ta hala for di e djente i e djente ta bira sensibel i mas fásil por haña buraku. I usa un skeiru ku su kabeinan Sòft.
Kantidat di pasta
Pa loke ta e kantidat di pasta, si ta un mucha chikí por pone un kantidat manera un pipita di aros i ora e tin 6 òf 7 aña ta pone manera un pipita di bonchi bèrdè òf manera un ‘lentils’ i mas krese por pone djis un tiki mas aserka. Importante ta pa e skeiru pasa tur kaminda.
Dental floss
Pero banda di skeiru e djente tin mas kos Dra Yuliana a bisa ku si e pashènt bai pa kòntròl riba indikashon di tin buraku, ta un tiki lat. Tin burakunan skondí ku por a evitá si nos usa Dental Floss. Ku e dental floss por evitá e burakunan skondí mei mei di djente. I komo e pashènt no tabata sintié, e no ta usa dental floss, ora e dentista haña sa di dje, ya ta lat i por krea problema pa e nèrvio di djente.
Awa pa spula boka
Pa loke ta e awanan pa spula boka, dra Yuliana a bisa ku esei ta bon pasobra e ta duna un aliento fresku pero no us’e ku alkohòl. Tin hopi estudio hasi pa preferibel usa sin alkohòl. Alkohòl ta relashoná tambe ku sierto enfermedat di boka. I p’esei ora hende ta bebe hopi alkohòl i genetikamente por sufri di enfermedat di boka manera kanser, e kos ei por hasi bu mas eksponé na malesanan. I p’esei ta purbando e líkidonan sin alkohòl.
Suku òf alkohòl ta daña djente mas lihé
Kua ta daña djente mas lihé, suku òf alkohòl? Dra Yuliana a splika nos ku no ta trata aki di un faktor so pero un kombinashon di kos. Por ehèmpel e dieta di pashènt, si e pashènt ta drumi ku boka habri debí na sierto anatomia ku ta pone ku su boka ta keda seku 8 ora largu anochi i esei ta hasié mas eksponé na malesa, otro ta esun ku ta chupa dede i ta hiba bakteria den e boka, pashènt ku no ta skeiru djente promé e bai drumi, ta masha hopi faktor por kousa ku djente por daña. Un pashènt ku suku tin tendensia ku e djente ta bira poko lòs i si e no tin bon higiena, e djente por daña muchu mas lihé.
