Indigenanan kolombiano durante un marcha di protesta kontra di gobièrnu di presidente Gustavo Petro, eksigiendo mas protekshon pa nan relashoná ku e konflikto- i agreshonnan konstante di kua nan ta bira víktima.
BOGOTA, Colombia (AFP).- Un grupo di indígena a enfrentá polis na Bogotá, kaminda nan a protestá pa pidi mas atenshon di gobièrnu den nan teritorionan ku ta keda gòlpiá pa violensia.
Algun shen nativo prosedente di zùitwèst dje pais a yega e kapital den bùsnan i a instalá nan mes riba Plaza de Bolivar pa pidi presidente Gustavo Petro pa e protehá nan teritorionan, gòlpiá pa e violensia di gruponan armá.
Djaweps mardugá, algun manifestante ku kara tapá a ataká e sistema di transporte “TransMilenio” serka dje presidensial “Casa de Nariño”, segun vidionan divulgá pa medionan lokal. Polis a respondé ku gasnan lakrimógeno i slannan di awa.
E alkalde di Bogotá, Carlos Fernando Galán a responsabilisá e indigenanan i a denunsiá agreshon kontra di funshonarionan.
Riba potrètnan por mira agentenan dje eskuadron kontra di disturbio di polis ekipá ku protekshon. For di un tanki tabata kore ku e manifestantenan ku spùitnan fuerte di awa. Rònt di Plaza di Bolivar algun indígena tabata stroba pasashi dor di forma kadenanan humano.
E pueblonan nativo ku a yega na e kapital a hasi esei for di e departamentonan di Putumayo, Nariño i Cauca, zonanan okupá pa eks-miembronan di e gueria FARC. Nan ta eksigí pa papia ku Petro.
E indígenanan ta e poblashonnan mas afektá den e konflikto armá kolombiano.
