Simpatisantenan di eks-presidente Evo Morales ta insistí ku nan kandidato mester ta eligibel pa bolbe dirigí e pais.
LA PAZ, Bolivia (AFP).- Enfrentamentu entre polisnan i manifestantenan ku ta reklamá e inskripshon dje kandidato presidensial di eks-mandatario bolivariano Evo Moralees -impedí di parti di hustisia- a laga komo 20 herido.
E manifestantenan pa algun dia kaba ta preshoná outoridat elektoral na La Paz pa aseptá e partisipashon di e lider indígeno pa e elekshonnan di ougùstùs benidero, apesar ku hustisia a determiná ku e no por opta pa un mandato nobo miéntras ku tambe e periodo di inskripshon a sera dia 19 di mei.
Partidarionan di Morales, di 65 aña, a tira piedra i otro opheto riba polisnan, ku a reakshoná ku gas lakrimógeno. “A arestá 20 persona”,segun e koronel Roger Montaño, hefe polisial.
E enfrentamentu a tuma lugá despues ku un representante di Partido de Acción Nacional Bolivariano (Pan-Bol), ku ta promové kandidatura di Morales, a keda strobá pa drenta Tribunal Supremo Elektoral pa presentá su lista di kandidato.
Pan-Bol no a logra inskribí na tempu e kandidatura dje eks-mandatario, via di un plataforma digital abilitá ku e meta ei, pero ta insistí di a manda e solisitut pa medio di e-mail den e tempu stipulá.
Tribunal Supremo Elektoral ta konsiderá ku e no a drenta.
Morales, ku a goberná Bolivia den tres periodo entre 2006 i 2019, legalmente no por ta kandidato. Un veredikto hudisial di 2023 a determiná ku ningun siudadano por ehersé e presidensia na mas ku dos okashon.
