WILLEMSTAD, O’Stad.- E situashon rondó di ENNIA Aruba a eskalá di un diskushon stratégiko riba benta pa un konflikto hudisial grandi. Ku un prosedura formal di enkuesta, gastunan ku ta subi i posibel komunikashon sensibel entre direktiva i supervisor, e kaso birando un dosier finansiero mas kargá den e region.
Nos informantenan hopi serka di loke ta pasando na Ennia Aruba ta splika ku loke a kuminsá komo un debate riba e futuro di ENNIA Aruba, awor a resultá den un paso hudisial formal. Un parti di e hunta di Komisario i e Direktiva bou di liderato di e CEO aktual a inisiá un prosedura di enkuesta. Nos informantenan ku ta konosé e situashon, a indiká ku esaki ta dirigí pa saka na kla posibel iregularidatnan, evaluá desishonnan di maneho i forsa intervenshon di e hues.
Den sektor, e meta real ta interpretá mas amplio komo un intento pa stòp òf tardá un benta na un konsorsio den kua aseguradó Guardian ta partisipá. E diskushon ta trata di un grupo di kumpradó liderá pa Aruba Investment Bank (AIB), den kua Guardian Group, segun informashon, lo tuma un partisipashon minoritario signifkante. E preokupashon prinsipal no ta solamente e struktura aktual di e grupo di kumpradó, pero tur loke lo por pasa despues.
Den sektor tin temor ku un parti di e akshonnan di AIB por bende despues òf ku akshonistanan chikí lo entregá nan interes, ku por hiba na un situashon kaminda Guardian eventualmente ta haña un interes mas grandi òf mesun kòntròl. Den un merkado chikí manera Aruba, un desaroyo asina por resultá rápidamente den un kambio struktural di poder di merkado, ku konsekuensianan direkto pa kompetensia i desaroyo di prima. No mester lubidá ku un grupo di kumpradó anterior, konsistí prinsipalmente di fondo di penshun lokal, a keda afó pa motibu di prosedimentunan rígido i linianan di tempu estrikto imponé pa supervisornan.
Loke ta hasi e kaso partikularmente sensibel ta ku e investigashon no ta limitá na toma di desishon interno den ENNIA Aruba òf e relashon ku ENNIA Caribe Holding (defakto CBCS), sino posiblemente tambe riba e ròl di CBA i mesun CEO aktual ku promé tabata na Guardian Group. Segun fuentenan, lo por tin komunikashon sensibel via WhatsApp entre e CEO di ENNIA Aruba i e direktor responsabel pa supervishon na Banko Sentral di Aruba. Tambe por sali na kla kontaktonan personal entre supervishon i direktiva di Guardian i AIB tokante e trato aki. Ounke kontaktonan asina no ta straño den relashonnan di supervishon, e sensibilidat aki ta den e sistema i tono di e komunikashon.
Den sektor ta sugirí ku esakinan no semper ta kuadra ku e ròl formal i distansia ku ta sperá di un supervisor. Lo por tin komunikashon no solamente funshonal sino personal via e-mail entre lidernan di e organisashonnan involukrá. E kontenido di e komunikashon lo ta relashoná ku loke ta deseabel i momento di e benta di ENNIA Aruba, inkluyendo diskushonnan riba strategia di benta, direkshon preferí pa e transakshon i konstrukshonnan di kumpradó.
Esaki ta hasi tur kos hopi sensibel. Nos informantenan ta indiká ku den kuadro klásiko di supervishon, tin un separashon kla: e supervisor ta evaluá transakshonnan, pero no ta dirigí nan aktivamente. Ora e frontera ei ta bira vago, manera fuentenan ta indiká, ta surgi riesgo di konflikto di interes, influensia riba desishonnan komersial i finalmente debilitashon di e ròl independiente di supervishon di CBA.
E posibel implikashonnan ta bai mas leu di Aruba. Segun fuentenan, e komunikashon lo ta mustra ku tin diferensia di opinion entre Banko Sentral di Aruba i Banko Sentral di Kòrsou i Sint Maarten. Miéntras CBCS parse ta preferá pa tene ENNIA Aruba mas tempu den e holding. Te awor, e ròl semi-independiente di ENNIA Aruba den e grupo ENNIA no a kousa efektonan negativo, ni durante e periodonan mas turbulento. Nos fuentenan ta indiká ku si e situashon segun CBCS ta korekto, e prosedura di enkuesta ta toka un otro punto sensibel: koordinashon i konsistensia di supervishon den un grupo finansiero ku ta operá transfronteriso.
Segun fuentenan, e relashon entre e direktivanan involukrá na ENNIA i CBA tabata pa hopi tempu bon i konstruktivo. Sinembargo, esaki a kambia na un momento krusial: ora e posibilidat di benta na e grupo liderá pa AIB ku Guardian komo akshonista minoritario a surgi. Esaki a trese bèk e proseso kompliká ku e promé grupo (fondo di penshun) dilanti.
Persona ku konosé e situashon indiká ku desde e momento ei, e persepshon a kuminsá krese ku e supervisor na Aruba posiblemente tabata dirigí aktivamente na e grupo nobo di kumpradó i ku lo por tin trato preferensial. Esaki lo por a fortalesé e sintimentu ku e ròl di supervisor no tabata kompletamente independiente. Loke promé a mira komo kolaborashon (inkluso personal), awor ta eksperensiá komo un kiebro di konfiansa.
Si e komunikashon alegá konsiderá realmente inapropiá pa e tribunal, esaki por pone preshon riba e posishon di funshonarionan individual na ENNIA Aruba i CBA, i posiblemente resultá den salida prematuro di direktivanan involukrá na tur dos organisashon. Pa un merkado finansiero chikí, kaminda konfiansa den institushonnan ta esensial, esaki lo ta un desaroyo ku tin konsekuensianan profundo, nos fuentenan a terminá.
