WILLEMSTAD.- E preparashonnan pa e konsierto ‘Mama pa Semper’ ku lo tuma lugá djadumingu awor na Octagon Plein di Avila Beach Hotel ku presentashon di Randel Corsen Group i Dibo Doran ta kanando masha bon mes.
E konsierto ku lo konta ku artistanan invitá Gibi Doran, Chin Behilia i Grupo Serenada lo konta tambe ku presentashon di ‘Antillean String Quartet’ ku ta un sekshon di kuèrdè ku lo figurá den algun kansion ku lo keda presentá e anochi aki.
“E spòtlait dje anochi lo ta nos músika lokal, pues tur loke ta di nos mes”, asina Dibo Doran a deklará na ‘DEN E BEMBE’.
Huntu ku e konsierto Dibo Doran lo pèrkurá tambe pa e mamanan hari un poko durante dje konsierto. Un rekomendashon pa bo kumpra bo karchi pa ‘Mama pa Semper’ lihé, pasó tin indikashon ku lo por kanta ‘sold out’ promé ku fecha dje konsierto.
