LA HABANA, CUBA, AFP.-Merka a imponé sanshon riba un grupo nobo di entidatnan militar i funshonarionan di defensa di Cuba, den un intento pa krea “kiebro” den gobièrnu di La Habana i pone preshon pa yega na reformanan demokrátiko.
Ta trata di e entidatnan ku ta bou di mira di Washington for di tempu ku atministrashon di Donald Trump a kuminsá su kampaña nobo di sanshonnan kontra e isla na yanüari.
GAESA: e motor ekonómiko di e militarnan
GAESA, e konglomerashon di e ehérsito kubano fundá pa Raúl Castro na 1995, ta un di e ophetonan di polítika di Washington prinsipal pa ku Cuba.
E a wòrdu kreá ku e meta di generá entrada pa e Forsanan Arma Revolushonario (FAR) i atraé divisa pa ekonomia kubano durante e asina yama “periodo espesial”, e krísis ekonómiko ku a surgi despues di e kaida di e bloke soviétiko na 1991.
Segun analistanan, GAESA tin kòntròl riba entre 40% i 70% di ekonomia kubano, i tin aktivonan ku por yega te na US$18 mil mion den sektor di turismo, komèrsio minorista, logístika, finansa i servisio portuario.
For di su fundashon, e ‘konglomerado’ a ekspandé rápidamente pa sektornan stratégiko, inkluyendo kadena di benta ku ta bende produkto na dòler; e Haf di Mariel, situá na wèst di La Habana i konsiderá komo e klave komersial mas importante di e pais; manera tambe pòmpnan di gasolin i servisionan finansiero.
Pa medio di su filial Cimex, e ret komersial, finansiero i logístiko mas grandi di Cuba, GAESA ta generá i kanalisá un gran parti di e entrada di divisa di e pais.
