MONTREAL (AFP).- E entiero di estado dje eks-promé minister kanades Brian Mulroney, kende a fayesé siman pasá, lo tuma lugá dia 23 di mart na Montreal, segun a keda anunsiá pa e aktual hefe di gobièrnu, Justin Trudeau.
“Brian Mulroney nunka a stòp di traha pa Canada. E tabata un defensor di e balornan ku ta uni nos komo kanadesnan, i semper nos lo rekord’é komo un forsa pa e bon di un i tur”, Trudeau a deklará.
“Su funeral lo duna oportunidat pa rindi homenahe na su legado inkreibel, ku lo sigui forma nos pais pa hopi generashon”, segun e promé minister den un komunikado.
Mulroney, kende a dirigí e pais di 1984 pa 1993, a fayesé djaweps na edat di 84 aña.
El a marka e bida polítiko kanades di dékada di 1970, partikularmente ku firmamentu di un tratado históriko di komersio liber ku Merka, ekstendé despues ku México.
Konbertí den promé minister den 1984, Mulroney tabata kontra dje régimen di apartheid den Suráfrika, loke tabata iritá su kolega britániko Margaret Thatcher, i el a start un aserkamentu espektakular ku Merka di Ronald Reagan, despues dje relashonnan friu bou e gobièrnu dje liberalnan di Pierre Elliott Trudeau, tata dje aktual dirigente kanades.
