Arlene Peternella; Sosiedat Santa Anna/ Seter pa Futuro
Si ántes nos tabata konosé Seter, nos hóbennan di awendia no asina tantu. Pero nan ta hasi un trabou tremendo den komunidat, i ta yuda famianan na momentu di entiero. Señora Arlene Peternella ta presidente di Sosiedat Santa Anna, Seter pa Futuro. Relashoná ku e nòmber Seter, el a splika ku el a pidi semper pa yud’é sa ta dikon a yam’é Seter siendo ku tur otro tabata karga sosiedat esta nòmber di un santu. Niun hende por a yud’é i e mes a kuminsá buska pa sa di unda e palabra a bin ku ta di hulandes òf spañó. I el a dal den Zitting ku ta serka di Seter. E ta bai di un grupo di persona sintá na mesa ta kobra i e ta kere ku ta ei banda e nòmber Seter a bin.
De Seter fo’i 18 aña
Arlene su mama a hink’é den Seter. Su tata tabata den Seter Santa Veronica i despues su tata a bira presidente. Dia Arlene a kumpli 18 aña su mama a hink’é den Seter. Konsekuentemente pa hopi aña e tabata den Seter i pa último 30 aña e ta den esun di Santa Anna. Un seter ta un kooperativa kaminda ta pone sèn huntu pa dera un hende. For di tempunan di pasado, deramentu tabata un problema. Tur e pida pida kosnan ku tin, for ora e hende fayesé te ora hib’é su tumba, tin yen kos pa gasta sèn na dje. Hendenan a disidí di bin huntu pa yuda pa dera.
Kabuya ta fir morto tabata un problema
Bayendo poko den historia, sra. Arlene a konta nos ku tur kos a kuminsá ku e kabuya ku mester a banda e kaha den e graf, 3 meter bou di tera. I mester fir e kaha manda abou. E kabuya tabata esnan diki ku ta na barku so ta haña. I ta hende hende or a kumpra e kabuya. Tempu famia tabatin kaya, ku tabata den spam di dak. Antes tabata laga traha un kaha i ta ward’é den dak. E tempu ei no tabatin plafòn i tabata pone e dak einan pa ora algu pasa e kaha tei kaba pasobra ta dura pa traha e kaha. I dependé kon bon pará e hende ta su kaha ta wòrdu trahá di bon palu sino tin di traha e kaha di sobrá di palu. Un karpinté tabata traha un pa 150 florin pero e hende mes tin di bai yuda òf e tin di bai ku e bòter plat ku ta ròm blanku. E hende tin su kaha kaba i ora morto kai esei ta un doló di kabes ménos. Pero ora morto kai mester dera denter di 24 ora pasobra no tabatin frizer e tempu ei. Bo ta bai santana, unu mas serka posibel. Ta pone e morto den trùk pa hib’é santana i mester di kabuya pa fir e kaha manda abou. Pero pa fia kabuya tabata un molèster. I p’esei e hendenan tabata disidí pa kumpra kabuya den nan ku nan i ta us’é ora hende fayesé. Pero tin bia otro ke fi’é pero no ta logra hañ’é. I asina Seter a nase. Kada hende ta duna tiki sèn i ora hende fayesé tin e kabuya. I asina un problema ménos.
Awor ta duna sèn
Despues di e kabuya a kuminsá pone sèn tiki tiki pa kubri mas gastu di entiero. A kuminsá ta duna un kaha e kabuya i un bandera. Asina el a forma te awor no ta duna kaha mas pero ta duna sèn. Ta duna un montante awor unda ta bai dera i kon ta kumpra i kaha. Seter pa Futuro no ta mará na un kas mortuario pero ta kere ku e hende mester ta liber pa skohe i tin e posibilidat ta mas mihó, kua funerario, kua mihó servisio i kua santana.
Buska miembro kas pa kas
Seter Santa Anna a kumpli 93 aña. I si tira un bista bèk den pasado, sra. Arlene a bisa ku tempu el a drenta, saliendo for di Santa Veronica, nan a haña dos puesto den e Seter aki. Nan tabatin mas òf ménos 500 miembro i tabatin un mener Pedro Davelaar. A yam’é di Santa Rosa i trese aki pasobra e tabata un hende aktivo. E tabata traha foyeto skibí na man i parti esaki kas pa kas. Na pia e tabata parti den bario i para splika e hende kon e mester ta den Seter pa no tin doló di kabes ora morto kai. No ta e hende ku a fayesé tin problema pero esun ku keda atras. Tabata konsehá e hende pa hinka henter su famia den Seter ya a famia ta keda trankil. Despues ku Arlene a drenta, e mener Pedro tabata bin ku su ideanan pa Seter haña mas hende. Nan tambe a sigui traha Foyetonan usando mashin di ‘stencil’. Tabata pega e ‘flayer’ ta snèk i tiendanan. Tabata bai te Bándabou a buska miembro. Awor aki tin mas di 1200 miembro.
Kooperativa
Pa loke ta e kontribushon, Arlene a splika Djasabra ku Seter ta un kooperativa i un ta yuda otro. Nunka niun hende a yega di paga e suma ku e ta haña. Awor aki e miembresia ta bira 10 florin pa luna. Imaginá bu ku den 10 aña bo a baha 1200 i si bo fayesé bo ta haña algu mas ku 4 mil florin pa entiero. Un ta bai den otro. Aki ta un ta yuda otro pa dera. I e sèn no ta yega pa dera pero e ta yuda ku algu. I p’esei nan ta konsehá pa drenta 2 seter i asina ta yega na e suma pa dera.
Awor ta duna sèn
E edat pa drenta ta máksimo 73 aña. For di 18 te 73 aña por drenta Seter. E yu di Kòrsou di awe no ta mesun sinsero ku esun di ántes. Nan tabatin problema ku ora hende drenta i muri despues di 3 luna, e no ta den balansa ku esun ku tin 10 aña. I p’esei nan a pone awor ku e hende mester tin por lo ménos 2 aña den Seter. Si bo muri den e temporada promé ku e 2 aña, bo ta haña loke bo tin hinka den dje. E miembro di Seter ta paga te dia e muri pero e suma ta mará na un kantidat pasobra un ta yuda otro. Antes ku interes di banko tabata mas, despues di tabata subi e suma. Antes tempu Arlene a drenta e hende tabata haña un kaha mas mil florin pasobra e kaha di morto tabata kosta mas òf ménos 1500 florin. Pero interesnan ta asina abou i no ta faborabel pa hasié.
Por dera ku ménos sèn
Tirando un bista bèk kon entiero tabata i awor, sra. Arlene a bisa Djasabra ku ku si ántes un kaha tabata keda trahá pa 150 florin, tempu el a drenta e kaba tabata 600 florin awendia un kaha di morto so ta 3 mil florin òf mas. Einan kaba e diferensia. Tambe ta bin ku tur e kosnan ku a bin rònt di entiero ta manera un fiesta. Por drenta ku ménos, pero ke mas i lubidá e resibunan ku ta bin despues. E ta kere ku por dera ku ménos sèn ounke entiero a bira karu. Antes e hende tabata bin kompañá e famia tur dia pero awor no por hasié mas. Entiero a bira mas karu ku un fiesta i si no tin 10 mil florin kasi no por dera.
Entiero friu
Pa loke ta e parti sentimental, e ta haña ku esei tambe a kambia, el a bira mas friu. Hende ta yuda si pero ántes tabata manera un famia. Tur hende ta bin huntu na kas pa yuda karga e momentu promé ku dera. Awor ta pone anunsiáo den korant i kondoler bo. Ta bisa e hende pa no ni bin kas. A pèrdè e kariñonan ku tabatin pa nos prohibí.
Hopi kompetensia
Nan ta hasiendo hopi promoshon pa haña mas miembro. Antes un ta trese otro aden. Pero a lubidá e kompetensia. Kompanianan di seguro a bin, nan tin mas sèn pa propagandá i asina Seter a kai chikí. P’esei awor nan ta bringando awor pa por haña mas miembro. Intenshon ta pa yega riba 2 mil miembro. Nan ke parti ‘flayer’ i algun propaganda mas. Tambe tin spesialnan pa hende por drenta. Nan ta riba FB Sosiedat Santa Anna pa haña mas i mas informashon pa por miembro. 6648828/7381938 einan por logra haña kontakto ku nan.
