WILLEMSTAD,- Landsrecherche Curaçao a inisiá awe mainta ku algun entrada hudisial na Kòrsou. Ta trata di entrada hudisial bou di liderazgo di un Wes-komisario miéntras ku na kada adrès tin un Fiskal di Ministerio Públiko (OM). Entre otro ta tene un entrada hudisial na kas di lider di MFK Gerrit Schotte. Tambe tabatin entrada hudisial den kas di politiko Charles Cooper I empresario Gilbert Ricardo.  Landsrecherche Curaçao ta hañando yudansa awe mainta di otro instansianan investigativo.

Landsrecherche ta un instansia di investigashon ku un tarea spesial. Nan ta dirigí nan mes entre otro riba komportashon di integridat ku ta tacha gobernashon públiko. Landsrecherche ta aktua solamente riba instrukshon di Prokuradógeneral (PG).

E investigashon ta na e momentunan aki andando. Ministerio Públiko (OM) ta bai duna mas informashon den transkurso di awe mainta.

UPDATE I:

Entrada hudisial di Landsrecherche relashoná ku soborno politiko

Awe mainta e inisiá ku tres entrada hudisial na Kòrsou ku a tuma lugá bou di liderazgo di un Wes-komisario. Ta trata di entradanan hudisial ehekutá dor di Landsrecherche Curaçao. Un entrada hudisial tabata den kas di miembro di Parlamento Gerrit Schotte. Tambe entradanan hudisial na kas di polítiko Charles Cooper i komersiante G.R.

Ta trata di un investigashon penal di Landsrecherche Curaçao ku pa esaki a haña sosten di otro instansianan di investigashon.

Prokuradó-general a duna instrukshon na Landsrecherche Curaçao na luna di febrüari 2017 pa inisiá e investigashon penal relashoná ku un denunsia di miembro di Parlamento Yael Plet relashoná ku posibel kaso di soborno. Banda di e denunsia a risibí tambe vários otro resultado di investigashon. A skucha por ehèmpel vários testigu den e kaso aki.

E investigashon a bin resultá entre otro den e sospecho ku a soborná un otro miembro di Parlamento. Mientrastantu dos persona a keda identifiká komo sospechoso.

Mirando e punto di e investigashon te ku aworakí tabata nesesario pa tene e entradanan hudisial awe. Mas entrada hudisial i/òf detenshon den transkurso di e investigashon no ta ser ekskluí.

Landsrecherche ta un instansia di investigashon ku un tarea spesial. Nan ta dirigí nan mes entre otro riba komportashon di integridat ku ta tacha gobernashon públiko. Landsrecherche ta aktua solamente riba instrukshon di Prokuradó-general (PG).

Korupshon, entre kua soborno di miembronan di Parlamento, ta forma un menasa serio pa nos estado di derechi. E ta mina e proseso demokrátiko i ta kibra e konfiansa di siudadanonan den nan representantenan di pueblo.  Landsrecherche i Ministerio Públiko Kòrsou pa e motibu ei ta duna prioridat na investigashonnan ku e formanan aki di korupshon.

E investigashon ta bai tuma mas tempu pa ser investigá. Ministerio Públiko ta bai duna mas informashon de transkurso di dia.

UPDATE II:

Djarason mainta trempan a tene entradanan hudisial na Kòrsou. Esaki den kuadro di e investigashon ku e nòmber “Wilhelmina” ehekutá pa Landsrecherche Curaçao. A tene entrada hudisial na kas di miembro di Parlamento Gerrit Schotte, na kas di polítiko Charles Cooper i komersiante G.R. E entradanan hudisial a tuma lugá, na tur tres adrès, den presensia di un Wes-komisario i Fiskal di Ministerio Públiko (OM).

Motibu pa e investigashon ta un denunsia di miembro di Parlamento Yael Plet di 18 di febrüari 2017. E sospechoso ta ademas soborno di un otro miembro di Parlamento. Te na e momentunan aki dos persona a keda identifiká komo sospechoso. Nan a ser pone na altura di esaki djarason mainta. Landsrecherche Curaçao a skucha mas testigu den e kaso aki. Ta trata di testigunan den e mundu polítiko.

Durante e entradanan hudisial a konfiská kòmpiuter, telefon, plaka i partinan di atministrashon. Esaki pa mas investigashon. Durante un di e entradanan hudisial a bin aserka un kaso di labamentu di plaka. Fiskal no ta deskartá mas entrada hudisial òf detenshon den e kaso aki.

Landsrecherche ta un entidat di investigashon ku un tarea spesífiko. E ta dirigí su mes riba investigashon di komportashon ku ta tacha integridat di gobernashon públiko. Landsrecherche ta hasi solamente investigashon si e haña enkargo pa esaki di Prokurado-general.

Korupshon, entre kua soborno di miembronan di Parlamento, ta forma un menasa serio pa nos estado di derechi. E ta mina e proseso demokrátiko i ta kibra e konfiansa di siudadanonan den nan representashon di pueblo. Landsrecherche i Ministerio Públiko Kòrsou, pa e motibu ei, ta duna prioridat na investigashonnan di e índole aki di korupshon.

 

LAGA UN KOMENTARIO

Please enter your comment!
Please enter your name here