WILLEMSTAD.- Reshèrshinan di warda di polis Montaña tin nan man yen atendiendo ku kasonan di kiebro den diferente bibienda parti pariba. Esaki ta un doló di kabes grandi ku tin i p’esei a lanta un tim spesial ku a drenta den funshon siman pasa djaluna, ku ta atendiendo ku e problemátika aki.

Kontinuando ku investigashon, ayera mainta trempan reshèrshinan di warda di Polis Montaña huntu ku  UST a bai un adrès na Seru Lora en buska di un posibel sospechoso ku mester responsabilisá su mes pa kiebro den kasnan prinsipalmente parti pariba.

E agentenan a drenta den e kas i despues a bandoná e adrès aki. No ta konosí si a konfiská kosnan di importansia pa e investigashon na e adrès aki. Loke si ta sigur, ta ku esnan ku ta hasi nan mes kulpabel pa kiebro den bibiendanan, pronto lo risibí un bishita no muchu agradabel di outoridatnan.

No mas ku siman pasa, representantenan di Kuerpo Polisial i di Ministerio di Hustisia, tabata di bishita na Sentro di Bario Montaña, na unda tabatin un enkuentro ku representantenan di bario pa papia tokante di e situashon di kiebro den kas i negoshi den Bándariba. Ya pa algun tempu kaba, outoridatnan di bario di Bándariba ta den kontakto estrecho  ku representantenan di barionan den Bándariba, pa yega na fórmulanan kon atendé ku e kasonan di ladronisia den kas i den negoshi.

LAGA UN KOMENTARIO

Please enter your comment!
Please enter your name here