WILLEMSTAD.- Gobièrnu di Kòrsou ta informá ku entrante djaluna 28 di sèptèmber, esta mayan, lo kuminsá ku implementashon di akshonnan konkreto pa fortifiká seguridat na skolnan. Esaki ta konforme palabrashonnan hasí ku e partidonan konserní. Tin sinku akshon konkreto ku ta bai atendé kuné pa logra e meta ya menshoná.
E kaso kaminda dos hóben a bringa na skol, saka kuchú pa otro te ku un dosente a resultá herida ora a bai kita nan a pone e hèmber yena. Sindikato Sitek a kanta akshon i durante di dos dia partidonan embolbí a deliberá riba e problema di seguridat den skol. Ministernan i Kuerpo Polisial a reuní ku sindikatonan DOEN, STSK, ABVO i STRaF.
Den e reunionnan aki a palabrá pa forma un grupo di trabou multidisiplinario, konsistí di ámtenarnan di e ministerionan konserní, representantenan di sindikato i representantenan di direktivanan di skol. E grupo aki lo ser formalisá mediante un Dekreto Nashonal.
Gobièrnu no a warda riba finalisashon di e proseso formal pa sigui aktua. Djaweps mes e grupo di trabou a reuní pa prepará e promé akshonnan konkreto ku lo kuminsá ser implementá entrante djaluna, 28 di sèptèmber.
Akshon 1: Momento di reflekshon durante e promé ora di lès
Tur skol lo dediká atenshon durante e promé ora di lès djaluna na norma i balor, rèspèt, toleransia, prevenshon di violensia, siudadania positivo i responsabilidat konhunto. E intenshon ta pa dialogá ku alumnonan tokante e responsabilidat ku kada un tin pa kontribuí na un ambiente eskolar sigur i respetuoso.
Akshon 2: Mensahe konhunto di e ministernan konserní
Lo sali mensahe di video di e ministerionan di OWCS, SOAW, Hustisia i GMN ku ta dirigí na direktiva di skolnan, dosente i personal no dosente, mayornan i alumnonan. E mensahe lo enfatisá ku agreshon i violensia no ta ser aseptá i ku tur parti tin un responsabilidat den mantené un ambiente eskolar sigur.
Akshon 3. Vigilansia dirigí na skolnan ku un perfil di riesgo elevá
Polis, direktivanan di skol, sindikatonan i gobièrnu a palabrá pa, entrante djaluna, mantené vigilansia adishonal i, kaminda ta nesesario, organisá vigilansia mas dirigí rònt di skolnan ku, a base di kriterio ophetivo, ta ser konsiderá ku un perfil di riesgo elevá.
Akshon 4. Palabrashonnan tokante raportá i duna “follow up” na insidentenan
Entrante djaluna lo apliká un prosedura uniforme pa reportá insidentenan. Den esaki lo ta definí kua situashon mester keda reportá inmediatamente, na ken mester hasi e reportahe, dentro di kua término i ken ta kordiná e ku e “follow up”.
Akshon 5. Un punto di kontakto visibel pa seguridat eskolar na kada direktiva di skol
Kada direktiva di skol lo disponé di un punto di kontakto pa asuntunan relashoná ku seguridat eskolar. Di e manera aki, entrante djaluna direktivanan di skol i representantenan di personal lo sa na ken nan por dirigí señalnan, preokupashonnan i situashonnan urgente ku ta rekerí atenshon. Mas detaye den edishon di EXTRA.
