WILLEMSTAD.- Ayera nochi na Sambil a tuma lugá entrega di premio di Festival di Tumba 2019.
Un bon públiko a presentá pa dje forma ei presensiá e entrega di premio.
PREMIASHON
Tumba Popular 2018 a resultá un empate entre Roald Balentien ku e komposishon ‘E’ i Clark ‘Yuyu’ Zalm ku e komposishon ‘Kurason dje’ko’.
Djei a sigui repartishon di premio pa entre otro Bryan ‘King B’ Goilo ku a gana e premio di Tumba Original ku su komposishon ‘Unda e kilonan ta?’; Sherwin ‘Pincho’ Anita a gana e premio di Tumba Chistoso ku e komposishon ‘Nami un chèns ei tras’.
Areglistanan tambe a risibí na premio: Ravello Antoin di dos finalista mihó areglo pa e komposishon ‘Bientu Fresku’ ku a keda interpretá pa Urvin Jano; Randal Corsen a risibí premio di promé finalista mihó areglo pa su areglo di e tumba ‘Kòrsou ta den su gloria’ i Axel Pikero a resultá e ganadó di mihó areglo pa su areglo di e komposishon ‘Ban pa Bai’.
Entrega di Premio Beti Doran pa mihó letra tambe a tuma lugá, Dibo Doran a risibí su premio.
E 12 finalistanan tambe a risibí premio, a entrega na number 12 i 11 un CD, miéntras ku # 10 te ku 6 a risibí un premio kortesia di OMNI. Di kuater finalista Gabriello ‘Cuco’ Cruz, di tres finalista Amos Balentin, di dos finalista Urvin Jano i promé finalista Ray Lauffer a risibí di OMNI un televishon komo regalo i aserka trofeonan entrega dor di diferente spònser.
Finalmente a hasi entrega di premio na Rei di Tumba 2019, Dibo Doran. Dibo tambe a risibí un televishon, mas dos trofeo ku ta praktikamente mesun largu ku Dibo.
Despues dje parti ofisial a sigui presentashon dje tumba ganadó i na final, Amos Agard di Star Motors a hasi entrega simbóliko di e yabi di un outo Haval ku Rei di Tumba 2019 lo tin na su disposishon entrante djabièrnè awor pa e por kumpli ku tur su kompromisonan.
Riba fotonan nos por mira algun momentu durante di entrega di premio.
