WILLEMSTAD.- Djabièrnè último e videoclip dje kansion ‘Por una Mujer’ a keda publiká riba YouTube i esaki a kapta atenshon mesora.

‘DEN E BEMBE’ a kombersá ku Ephrem J i el a indiká di ta masha kontentu ku e oportunidat i konfiansa ku Montelier a dun’e. ‘E ta un ‘upcoming’ artista den e género di bachata i ta un persona multitalentoso. E mes a komponé i areglá e piesa, miéntras ku produkshon dje videoclip tambe tabata na su enkargo’.

Montelier, kende ta un artista kubano residensia na Suisa, a biaha bin Kòrsou pa aki a graba e videoclip ku a tuma lugá den e área di Pietermaai na e establesimentu ‘Bar P’.

EPHREM J

Pa loke ta trata produkshonnan di Ephrem J mes, el a indiká di ta pendiente pa lansa dos piesa mas promé ku fin di aña i ku e estreno di su albùm nobo lo tuma luga ku tur probabilidat den luna di febrüari 2022.

‘E situashon afó ta keda un ‘challenge’, na Hulanda por organisá aktividat te ku 12’or i na otro paisnan tin yen di eksigensia ainda ku ta difikultá pa organisá evento, meskos ta e kaso na Kòrsou kaminda te ainda e orario ta 12’or di anochi.

Mi tabata pendiente pa organisá un konsierto huntu ku Alexandra aki na Kòrsou pero no tin sigur ainda ku esaki lo por tuma lugá den luna di desèmber’, asina Ephrem J a splika.

Ban sigui sostené nos artistanan lokal ku ta profilá di un forma positivo riba e merkado internashonal.

LAGA UN KOMENTARIO

Please enter your comment!
Please enter your name here