Epidemia di ébola ta “leu for di bou kòntròl”

GENEVE (AFP).- E epidemia di ébola den Repúblika Demokrátiko di Congo ta
leu for di bou di kòntròl”, segun e direktor di Organisashon Mundial di Salú, kende a atvertí riba e riesgonan haltu pa e epidemia plama pa otro paisnan.
“Tres luna pasá mi a deklará ku e epidemia dje enfermedat pa e vírus Budibugyo den e pais ta representá un situashon di emergensia di salú públiko riba nivel internashonal. For di despues di esei, e epidemia a plama hopi lihé i e riesgo di un ekspanshon mas grandi ta hopi haltu”, segun Tedros Adhanom Ghebryesus a indiká den un reunion ayera.
Un balansa publiká djaluna di parti di outoridatnan di e pais afrikano a revelá ku ta trata dje epidemia mas mortal den historia, ku mas di 2.300 morto i 5.000 kasonan konfirmá.
Congo dia 15 di mei a deklará, ku vários siman di retraso, un brote den regionnan di nort i ost dje pais, kaminda ku e presensia dje estado ta débil i e infrastruktura di salú ta hopi malu.
Ta e di dos biaha ku e Komité di Emergensia di Organisashon Mundial di Salú ta reuní for di despues ku dia 17 di mei a deklará un situashon di emergensia di salú públiko di importansia internashonal, e di dos nivel di alerta di mas haltu.
E epidemia di 2018-2020 den parti ost di Congo, konsiderá te na e momento ei esun ku mas morto den historia dje pais, a kousa 2.299 morto di un total di 3.381 kaso konfirmá.
Ounke aktualmente no ta eksistí ningun vakuna i tratamentu spesífiko aprobá kontra dje vírus Budibugyo, tin vários inisiativa den desaroyo ku e speransa di para e epidemia.