ISTANBUL, TURKIA, AFP.- E presidente di Turkia, Recep Tayyip Erdogan a bisa djaluna ku lo konstruí dos hospital ku kapasidat pa akohé 1.000 pashènt na Istanbul pa trata pashèntnan infektá. E siudat ta e episentro di kasonan di Coronavirus den e pais.
Turkia a registrá 649 morto relashoná ku Coronavirus i 30.217 kaso segun sifranan ofisial publiká djaluna.
E minister di Salú, Fahrettin Koca a bisa siman pasa ku mas di mitar di e kasonan a wòrdu registrá den e pais su kapital ekonómiko, i e siudat di mas grandi, Istanbul.
Erdogan a bisa ku Turkia a mobilisá tur rekurso pa kombatí e vírus, segurando ku e hospitalnan turko no tin ningun problema pa diagnostiká i trata e kasonan di COVID-19.
“Nos lo kompletá e dos hospitalnan dentro di 45 dia i lo habri esaki pa públiko”, asina Erdogan a bisa den un diskurso na televishon. Un di e hospitalnan lo wòrdu konstruí den e área kaminda e siudat su aeropuerto internashonal tabata na e banda Europeo. E otro hospital lo wòrdu konstruí na Sancaktepe na e banda asiátiko di Istanbul.
