Eric Garcia a entregá petishon na korte pa persiguí dos “sospechoso” den su kaso

WILLEMSTAD.- Ayera eks direktor di Girobank, Eric Garcia a subi e 21 trapinan di Palasio di Hustisia kaminda el a entregá petishon na Korte pa persiguí dos “sosio” ku ta sospechoso den su kaso tambe. Ta trata di dos hòmber di fam Silver i Hu ku ta biba na Merka.
Garcia a keda kondená dia 8 di mei na 4 aña di prisòn pa akto di malversashon, falsifikashon i tambe labamentu di plaka dia 8 di mei. E dos hòmbernan aki tabata sospechoso den su kaso ku ta karga e nòmber “Astro”. Ministerio Públiko no ke a persiguí e dos hòmbernan merikano i awor Garcia a bai korte pa pidi pa Ministerio Públiko tòg persiguí Silver i Hu.
Durante tratamentu di e kaso, Garcia a splika ku el a falsifiká e dokumentonan, pa motibu ku e mester a pidi hues komisario pèrmit pa saka e sèn pero no tabata sa esei fo’i un prinsipio.
Mirando ku e no tabatin e prueba ku el a fia Silver i Hu ku ta biba na Merka e montante pa kumpra 58% di e akshonnan di Giro, el disidí di traha un prueba pa hues komisario den kompania di Silver i Hu. Pero Silver i Hu tambe lo a yud’é den e kaso aki i no ta keda persiguí.
Garcia ta keda akusá di malversashon komo curator, falsifikashon di entre otro dokumentonan di banko Maduro na nòmber di Banco Maracaibo N.V. i tambe labamentu di plaka. Tur esakinan den e periodo di 1e di yanüari 2010 te ku 20 di yüli 2016 na Kòrsou i tambe Merka. Segun e akusashon, Garcia lo a malversá un montante di 11 mion dòler merikano for di Banco Maracaibo N.V. Tambe e ta keda akusá di a falsifiká e dokumentonan.
E tabata curator den kaso di fayesimentu dje banko venezolano. Dor di e echo ku Garcia a hasi, no tin suma disponibel pa paga e mas di 1500 kliente venezolano di e banko perhudiká.

SHARE

LEAVE A REPLY