TAMPA, USA (AFP).- Ernst Bontemps ta klaba i pega tur loke e tin pa protehá bentananan di su klínika médiko di Saint Petersburg, den wèst di Florida, pa di dos biaha den dos siman. Su siudat, gòlpiá pa orkan Helene, awor ta den trayekto di Milton.
“E kos aki ta demasiado”, segun e siudadano di 61 aña. “E ta doloroso pasobra e último biaha tabatin un ravage kompleto den hinter Saint Petersburg, i ata nos atrobe”.
E área di Petersburg i Clearwater ainda tin sikatrisnan di Helene, e orkan kategoria 4 ku a laga 227 morto den zùitost di Merka.
Treasure Island, un isla di gòlf di México, situá hopi serka di Saint Petersburg, ainda tin kayanan kubrí di tur loke Helene a destrosá.
Otro siudadano, David Levitsky, ta para opservá ku preokupashon. “Tur e kosnan aki ta manera gasolin pa e bientu i ken sa kon tur e kosnan den kaya aki lo bai dal e hendenan”, segun el a komentá.
Manera hopi otro residente dje siudat chikitu, Levitsky ta purba protehá e poko ku a keda despues di orkan Helene. “Biba pegá ku laman ta trese un legria, pero opviamente, e legria ei ta bai kompañá pa hopi otro posibilidatnan negativo”, segun el a komentá.
Komo 40 km mas ost, den Tampa, e poblashon ta prepará pa sufri su tormenta di mas pió den hopi aña. E siudat di 400.000 habitante ta teme pa e manera ku laman lo subi i e inundashonnan.
Meimei di tur esaki, Tifany Burns ta prepará pa un otro tipo di evakuashon. E direktor dje programa di animalnan di parke di bestia di Tampa, ta supervisá unda tur e bestianan ta bai keda: olefante, orangutan i otronan.
E parke di bestia ta konta ku vários edifisio ku por resistí orkan. “Nos ta spera ku nan lo sufri ménos strès posibel, esei semper ta nos meta”, segun Burns.
