WILLEMSTAD.-E dianan aki tur atenshon ta riba Refineria di Kòrsou (RdK) despues ku nan mes a duna di konosé públikamente ku dentro di poko lo informa gobièrnu kua ta e kompania ku nan ta rekomendá pa operá i manehá e refineria di Kòrsou. E importansia di e refineria ta hopi grandi pa ekonomia i hinter komunidat di Kòrsou pasobra aparte di esnan ku ta traha direktamente den e refineria tin hopi famia mas por tin un bibá desente na momentu ku e refineria ta den operashon. Tin indikashon serio ku e eskoho ku Kòrsou hasi lo por tin konsekuensia hopi serio pa e futuro relashon ku Venezuela.

Informashon ku EXTRA ta tuma nota di dje ta ku RdK lo ta kombersando ku mas ku dos grupo ku tin interes serio pa operá i manehá e refineria i tambe instalashonnan na Bullenbaai. Entre e gruponan ku tin interes por a tuma nota ku ta menshoná sigur dos grupo ku lo tin konekshon òf ta direktamente embolbi ku empresarionan venezolano. Ta bon konosí ku e refineria di Kòrsou ta un di e pokonan ku por trata e krudo pisá di Venezuela sin niun problema. Sanshonnan di Merka kontra Venezuela a pone ku no por a sigui traha ku PDVSA mas. Konsekuensia di esei ta ku PDVSA a laga un debe kuantioso atras na RdK. Ainda ta kombersando i luchando pa haña e parti di sesantia ku ainda e trahadónan mester kobra.

E tim negoshadó di RdK ta hasiendo un tremendo labor i ta tene kuenta ku tur reglanan di bon maneho i pa no faya manera a sosodé den pasado resien.

E punto ku e eskoho ku Kòrsou hasi lo por tin konsekuensia serio ku Venezuela ta motibu di preokupashon. Manera ta konosí Nicolas Maduro presidente, riba su mes, a sera frontera ku Kòrsou. Sanshonnan di Merka ta primi Venezuela i su dirigentenan pero ei mes por tuma nota ku for di momentu ku a start e guera entre Rusia i Ukrania ku funshonarionan di rango haltu a bai Venezuela i a reuní ku presidente Maduro i su kasa. Awe EXTRA mes ta informa ku ta konsiderando e posibilidat ku Marka ta suavisá òf elimina e sanshonnan. Ku esaki na bista e pregunta ta surgi si Kòrsou, esta RdK, bai skohe pa un grupo di opositornan polítiko di Venezuela.

Esaki mester ta un punto ku RdK i gobièrnu lo mester tene na konsiderashon na momentu di hasi un eskoho! Hulanda komo aliado di Merka sigur tin bista riba e desaroyonan aki pa e parti di geopolitika.

 

 

LAGA UN KOMENTARIO

Please enter your comment!
Please enter your name here