Muchanan ta drenta klasnan den e aña eskolar nobo na Caracas. E echo ku Merka a bombardiá skolnan tabata tópiko di kòmbersashon riba e promé dia di skol den 2026.
CARACAS (AFP).- E presidente interino di Venezuela, Delcy Rodriguez, ayera a forma su gabinete pa remplasá esun di Nicolas Maduro, den e promé kambionan ministerial di su gobièrnu. Rodriguez a designá e kapitan Juan Escalona komo minister di ofisina di presidensia, ku ta sòru pa e agènda presidensial i ta sirbi pa komunikashon ku e diferente organisashonnan di estado.
Escalona a forma parti dje grupo di seguridat di Maduro, ku a keda kaptura dia 3 di yanüari huntu ku su kasá, Cilia Flores. Den e Atake ei 55 mitar, inkluso 32 kubano, a pèrdè nan bida. E presensia di Escalona dia 4 di yanüari den e promé konseho di ministernan ku Rodriguez na kabes a eliminá e rumornan ku el a muri den e operashon kontra di Maduro. Escalona ta forma parti dje promé modifikashonnan dje gobièrnu nobo, ku ta bou preshon di Washington.
Ademas di Escalona, a designá otro militar, Anibal Coronado, komo minister di Ecososialismo (medio amiente).
Rodriguez a anunsiá e nombramentunan riba su kuenta di Telegran. ”Mi sa ku nan lealtat, kapasidat i kompromiso lo kontribuí na desaroyo dje plannan di nos gobièrnu bolivariano huntu ku e pueblo”, segun Rodriguez a skibi relashoná ku Escalona, kende tabat’ei for di tempu di Chavez,.
Despues di morto dje presidente popular den 2013, el a traha den seguridat di Maduro.
