E ultimo tèst fuerte promé ku mundial
WILLEMSTAD.-E wega kontra Eskosia djasabra trempan ta importante pa diferente motibu. Esun mas prinsipal ta ku nos ta haña un bista di nos forsa promé ku mundial. Ta probabel ku nos lo mira riba tereno mas o ménos e diesunnan ku lo start na mundial. E eskosesnan stima futbòl, apesar ku nan no ta konta den e grandinan di Europa. Nan ta hopi pashoná ku e wega i ta ferviente fanátiko di nan elenko nashonal. Hampden Park na Glasglow, ta kas di weganan di nan selekshon i ta bira un manikomio chikí ora e ‘Ehérsito Tartan’ ta hunga. Un gritamentu di komienso ta final animando nan ekipo.
E selekshon tin kalidat
Nan a derotá e ekipo Danes 4-2 na kas pa sigurá nan boleto pa mundial, dilanti mas ku 50 mil fanátiko ku a yena e stadion di bote en bote i okashoná un teremoto chikí. Nan tin algun hungadó di nivel haltu den ekipo grandi. Nan kapitan i defensa lateral robes di Liverpool, Andy Robertson tin mas ku 300 wega den Liga Premier, esun mas fuerte na mundu. Nan dos mihó hungadónan ta den bolante, John McGinn, un bolante ofensivo fuerte ku bon téknika ku ta kapitan di Aston Villa ku kende el a kaba di gana Europa League. E tambe tin kasi 300 wega den Liga Premier. Scot McTominay di Napoli ku a hunga kasi 200 wega den Manchester United, ta otro bolante konosí na Europa, e ta un asina yamá ‘box to box’ bolante, ku ta opera di área penal pa área penal i ta un peliger serio den laria, paso e ta fuerte ku bon estatura i ta kòp bon. Billy Gilmour, su kompañero den Napoli i ta hasi e trabou shushi mei mei di tereno. Ché Adams di Torino ta nan sentro delantero. McGinn i McTominay tin mas gol anota ku tur nan delanteronan huntu. Nan línea ofensivo no ta nan parti mas fuerte.
Mei mei tereno ta bira un bataya físiko
McGinn i McTominay, e dos bolantenan di nivel ta dikta nan wega i ta físikamente fuerte. E promé ta blòki betòn i McTominay ku ta riba 1.90 meter, tin estatura i ta kasi invensibel den laria. Den tiru di skina e ta drenta manera bulldozer den area penal chikí. Si nos por kontrolá nan dos, nos por duna un bon wega. Nos ta bai haña preshon i mester purba tene e bala i lur riba kontragolpe. Nan portero ku 43 aña lo ta probablemente esun mas bieu na mundial. Nan kapitan Robertson, ta e úniko defensa ku tin un puesto estelar na nivel haltu. Tin posiblidat pa nos hungadónan ofensivo i tékniko manera Tahith Chong i Sontje Hansen riba ala.
Moral mester keda haltu.
Irespekto e resultado, nos mester keda di fokus riba mundial ku ta nos meta final. Komo nos no tabatin hopi wega den e mes un konstelashon, esaki ta un bon oportunidat, pa wak e mihónan den akshon ku otro. Asina nan ta hunga mes ora tambe bou di preshon den un Hampden Park ku bochincha for di kuminsamentu te final. Hopi di nos muchanan ya a kustumá si ku wega grandi i diferente a hunga den kampionato fuerte na Europa. E ambiente den e muchanan semper ta bon i nos tin un par di hóben prometedor ku ta duna speransa pa futuro. Laga nos gosa di e wega aki tambe. Depues di aki, ku eksepshon di día 6 di yüni ku lo ta un wega mas festivo, ta kandela grandi ta bai kuminsá dia 14 di yüni awor na Houston. Eskosia ta posishoná number 43 riba ranking di FIFA i ‘Pantera Negra’ ta number 82.
Skibí pa Eldon ‘Peppie’ Sulvaran
Foto 4 Peppie
Selekshon di Eskosia
