BOGOTA (AFP).- Gobièrnu di Colombia a kita for di algun ret sosial e videonan ku ta musta e presidente Abelardo de la Espriella kanando entre kadavernan di supuesto kriminalnan ku a keda matá pa polis i militarnan. El a hasi esei despues di un veredikto di korte.
Djamars último, un hues a ordená pa temporalmente kita e videonan di kadavernan den sakunan blanku publiká dianan 2 i4 di sèptèmber riba e wèpsait di presidensia riba Instagram i tur e retnan dje grupo Meta. E medida lo keda te ora ku un hues emití un sentensia riba e punto si e kontenido ta violento i si e mester keda retirá di forma permanente, si òf no.
Ku algu mas di un luna ku el a sinta, e derechista De la Espriella ta hibando un ofensiva di morto kontra di krímen organisá i esaki ku apoyo di Merka, su sosio militar prinsipal. E abogado multimionario eséntriko tin e kustumber di mustra e resultadonan di su operashonnan riba video i esakinan semper ta sera ku e gritu “¡Viva Cristo Rey!”, ku muzik di guera den fondo.
Den un luna di tempu el a ordená tres bombardeo riba kampamentunan gueriero den Amazona na e frontera ku Venezuela, ku un saldo di por lo ménos 42 morto, seis di nan menornan di edat.
Despues di e bombardeo mas pisá kontra di supuesto guerieronan for di 2015, el a kana huntu ku militarnan entre e kadavernan hinká den sakunan blanku i a menasá e rebeldenan: “Nos lo kaba ku bosnan”.
Den un komunikado riba X, outoridat forense nashonal a rechasá e eksposishon di e kurpanan den sakunan, refiriendo na “vulnerabilidat di dignidat humano”. Apesar di kita e kontenidonan for di e wèpsait di Meta, e videonan a sigui aparesé riba wèpsait presidensial di X.
