MANCHESTER, GRAN BRETAÑA, AP.- Grupo Estado Islámiko a atribuí responsabilidat na e atake suisidio den un konsierto di Ariana Grande ku a laga 22 morto djamars.
Gritu di e adolesentenan a yena Manchester Arena despues di e eksploshon djaluna anochi, miéntras tur tabata dal den otro den un intento pa hui. Sinkuenta i nuebe persona a resultá heridá i eks Promé Minister britániko Theresa May a kalifiká e atake aki komo algu monstruoso.
“Ta difísil pa komprondé e mentalidat perverso ku bo por a wak den un sala yen di mucha i hóben”, asina el a bisa. E kampaña pa elekshon di 8 di yüni a wòrdu suspendé.
Polis di Manchester a bisa ku e agresor a muri den e atake. Agentenan a anunsiá detenshon di un hòmber di 23 aña den parti sùit di e siudat, relashoná ku e atake.
Estado Islámiko a bisa djamars ku “un sòldat di kalifato a pone e bòmnan meimei di e multitut i despues a aktivá esakinan. Estado Islámiko no a presisá si e atakante a muri. Polis a bisa ku esaki a usa un “aparato improvisá”.
E insidente a kousa un búskeda entre sernan kerí durante oranan di anochi, ku mayornan purbando di lokalisá nan yunan adolesente i gruponan a separá despues di e eksploshon ku tabata purba reenkontra. Twitter i Facebook a yena e petishonnan di informashon riba personanan pèrdí.
