BUENOS AIRES, AP.- Shete di kada 10 hóben ku ta kaba skol sekundario na Argentina no tin konosementu básiko di matemátika i mitar no ta komprondé loke nan ta lesa. Asina un estudio ofisial a mustra, revelando e deterioro di e kalidat edukativo.
Presidente Mauricio Macri a duna e konklushonnan aki djamars despues di presentá e resultadonan di Plan di Siña 2016 hañá desde un revelashon realisá na 1,7 mion alumno di nivel primario i sekundario di 39.000 skol públiko i privá di e pais.
“E resultadonan tabata hopi malu, sorprendentemente malu”, segun indikashon di e mandatario.
Macri a duna e evaluashon na momentu ku e dosentenan ta kumpli ku un dia nobo di wèlga despues di vários dia di parto reklamando un oumento salarial nashonal di 35% pa kompensá e depresiashon di nan entrada debí na inflashon di kasi 40% aña pasá.
E diálogo ta avansá lentamente i no a logra skapa protestanan di vários sindikato di edukadornan ku ta afektá miónes di mucha ku ta bai skolnan públiko.
“Kuater di kada 10 alumno di grupo seis di skol básiko na skol públiko no ta komprondé teksto i na esnan privá, dos di kada 10. Esaki ta marka un desigualdat teribel di esnan ku por bai skol privá i esnan ku mester bai skol públiko”, segun presidente.
Macri a anunsiá ku e lo manda un plan ku metanan spesífiko pa Parlamento, “kual lo permití nos pa resolvé e kuestion edukativo”. E presidente a pidi pa “evaluá e maestronan permanentemente”.
