Esun ku nunka a haña masashi no sa kiko e ta pèrdè!

Franklin Calmero;Curavia Wellness Institute

 

Bida a pusha mi den e direkshon akí; masashi ta muchu mas ku mishi ku un hende

 

Masashi ta un luho òf nò? E ta nesesario? Un masahista ta un fisioterapista tambe? Nos bienestar general i tambe esun mental. Tur esaki Franklin Calmero ta papia di dje i ta duna nos tep kon pa nos kuida nos salú.

Di IT’er pa masahista

 

“Bida a pusha mi den e direkshon akí”, Franklin Calmero a kuminsá pa splika kon bin e ta den e direkshon akí. Di kas mi ta un IT’er. El a kuminsá traha na 1998 pa un kompania di kòmpiuter. IT ta su kos, tur dia e ta hasié i ta su mundu. Trahando na e kompania, na aña 2000 na trabou e no a sinti su kurpa masha bon. Un bon amigu di dje ku e ta gradesido na dje te awe, e persona ei a push’é i bis’é pa bai dòkter. Ami a keda para ariba ta un simpel doló di kabes. Pero pa kuminsá bòltu palabra kemen algu no tabata bon. E amigu a hink’é den outo i a puntr’é unda e hib’é. El a bisa hib’é hospital pa e duna sanger, pasobra esei e ta sa hasi. Pero sintá den e stul ei, ora el a habri su wowo bèk e tabata sintá den sala di emergensia. Ta zùsternan a splik’é kiko a sosodé. Nan a saka afó kiko tabata pasando kuné, ku tabata un trombose. El a bai Venezuela pa tratamentu. E kos ei a pone ku e no por a ni papia bon. Ora el a kuminsá traha bèk, el a kuminsá bèk den IT. Pero komo e tabatin tempu largu malu, el a disidí di kuminsá su mes empresa di IT. Franklin a traha pa diferente kompania entre otro streaming di radio riba internèt. E ta kòrda ku nan a hasi festival di tumba i asina el a sigui den su mundu. Dado momentu el a topa un mucha hòmber ku a bira su bon amigu, esta Benjamin Smith di Basilachill. Nan dos tabata hasi meskos i nan a klek bon ku otro. Nan a disidí di trese karnaval di Kòrsou pa mundu mir’é. I nan a bin ku a idea pa transmití e karnaval den 9 lenga, kreando nan mes sistema i a hasié. Tempu Franklin a kuminsá ku su mes empresa, tabatin kosnan ku no a kana bon i e mester a ser’é. El a sigui lucha pa e bin bei. Den e temporada ei el a haña oportunidat pa hasi estudio pa bira un tékniko meteorológiko, esta, un opservador. Nan ta duna informashon na e partí di aviashon. Einan na 2014 el a drenta gobièrnu. Meimei di dje el a keda ku asuntu di transmishon di karnaval. Franklin ta konta ku e dia promé ku karnaval, e anochi ei, e ta bayendo kas i el a haña aksidente ku bròmer. E ta kòrda ku e pikòp a subi para riba su pechu. El a sa despues ku e tabatin 3 repchi kibrá, pero esei el a sa despues di 2 siman. Esaki a bolbe pusha den e mundu di rekuperashon i mira kon e zùster i brudernan i asta dòkternan tabata atendé kuné. E tabata mira i skucha kon zùsternan ta reklamá doló di lomba, otro ta bisa ku el a drumi malu. Tiki tiki e ta puntra su mes si nan ta kuida e, ta ken ta kuida nan. I ku e parti di rekuperashon e tabata ke sa kiko ta sosodé kuné.

Di trombose pa aksidente ku bròmer te awe

 

Ku tur esei su dilanti, el a kuminsá studia Anatomia. Esei a pone ku ya ku e tabata gusta e parti di masashi, a pon’é bai mas profundo den dje. Aña 2000 el a pasa ku trombose i 2016 ku e aksidente a pon’é den e direkshon ku e ta awe ku e ta awe. Asina el a kuminsá duna masashi. Pero promé ku el a mishi ku un persona, el a bai sertifiká su mes. Tin hopi mas kos tras di un masashi ku simplemente mishi ku un hende. Ora el a sertifiká su mes den e promé parti, el a gusta. Komo trahadó di gobièrnu su pashon tabata pa yuda un persona ku doló. E por komprendé ora un hende tin doló, kiko e kos ei ta.

 

Konosé e hende promé ku mishi kuné

 

Promé mishi ku un persona ta importante pa hasi preguntanan promé ku mishi ku un persona. E persona por yega i bisa ku e ta kansá i e mester di un masashi, pero mester sinta i papia ku e persona ta dikon e ta kansá, kiko ta pone ku e ta kansá. Den e kansansio, e hende por bisa ku e ta bebe remedi pa preshon i esei ta un indikashon ku mester wak. Tin kos ku mester sa ku ta bira kontra indikashon promé mishi kuné pasobra por hasié daño dor di simplemente mishi kuné.

 

Separá fisioterapista i masahista for di otro

 

Mester separá e dosnan aki, un masahista no ta un fisioterapista. Ta dos mundu diferente ku kisas ta kana banda di otro si. Un fisioterapista a studia 7 aña pa ta terapista riba e nivel médiko pero nan komo masahista ta riba e parti holístiko. Pa por bira un masahista ta tuma aña pero e riguroso ku bo mester ta serka un fisioterapista ku ta sòru pa e mobilidat, ta pone ku e ta otro rango for di e masahista. Mester tene e dos kosnan ei for di otro.

Curavia ta e kaminda di kura

 

E palabra Curavia ta bin di Kura i Kòrsou (Cura). Den e temporada ku el a pasa den e situashon ku bida a siñ’é hopi kos manera trombose, negoshi a bai robes, hasi estudio tabatin e parti di kura i despues tabatin aksidente tambe. I via ta e kaminda pa. I asina el a yega na e nòmber di Curavia. E slogan di Curavia ta bisa ku ta e kaminda pa bo bienestar. Curavia ta su mes eksperensia ku el a pone afó, esta, kana un kaminda pa logra.

 

Servisionan

 

Curavia ta traha riba henter e liña di masashi, for di masashi relahante, deep tissue, limfanito, post operatorio, drenahe i body contouring esta drecha aki i aya pero no ku angua pero ku man i mashin. Henter e liña di masashi i el a profundisá su mes den konosé yerba pa yuda un persona ku kisas tin doló di stoma etc. etc. i por yud’é ku e parti tradishonal.

 

Masashi ta sagrado

 

Pa Franklin ta super robes si nos ta mira masashi simplemente komo algu di luho òf pa djis nos bai pasa un ratu dushi. Masashi ta algu sagrado. E ta hopi importante pasobra bo mester imaginá bo mes bo ta lanta mainta i pia ta morde un tiki pero tòg bo ta push’é den sapatu i bai trabou. Pero bo tin un doló i tin un situashon ku bo kurpa ta asina inteligente ku e ta indiká esei. Pero ta yega momentu ku e kurpa mester di sosiegu i einan e masashi ta kai aden pa duna e trankilidat, yuda sirkulashon i hopi benefisio kompará ku djis wak un hende tuma masashi sin mas. Ta importante pa bo sa ken ta bo masahista i ki tipo di masahista bo tin pasobra ora bo drumi riba un kama, bo ta habri bo mes pa otro i bo ta habri bo mes, e ta energia i bo por sali mas pisá ku bo a drenta. Nos ta rondoná di energia i ta traha ku esei.

Konosé bo masahista

 

Franklin por duna e hende tambe konsehonan kiko pa e tene kuenta kuné pero esei semper i kuando e sa su historia i si e persona ta “fisio vrij”. Si persona ei tabata serka un fisioterapista ta ora esaki bisa ku e ta kla kuné, e ora ei e komo masahista por yega serka. Tur esaki pa evitá ku ta kontradesí e fisio. Mester sa ku e ta pashènt serka e fisio i serka nan e ta un kliente, e ta fisio ‘vrij’ pa por atendé. Nan komo masahista no por yama e persona un pashènt pero un kliente.

 

Wellness ta muchu mas ku kome salú i bai gym

 

Curavia ta bienestar. Franklin ta splika ku hopi bia ta wak e parti di Wellness (bienestar) solamente ku kome salú i bai gym. Pero bienestar ta nifiká e mundu di masashi tambe. E ta nifiká mental, hopi mas. Tin diferente etapa. Wellness ta konsistí di 8 parti i den dje tin e bienestar finansiero tambe. Franklin a bisa ku e hende mes sa ku wellness ta kome i bebe di hopi parti i nan ku ta duna masashi ta forma parti di dje.

 

Komo masahista kapasitá bo mes

 

Por ripará ku ta papia hopi di Wellness i ta enpartikular tambe e Wellness di turismo. Pero Franklin ta haña ku ta poniendo e énfasis robes. Promé kos ku mester hasi ta sòru pa tin profeshonalnan ku ta duna servisio i poné na e stándart pa esei tambe. Hopi hende no tin esaki. Nan ta bende e servisio i e turista ta paga p’é, pero e hende ku a duna e masashi ta djis primi i aki i aya i ta kla. Pa Kòrsou ta mas fuerte pafó mester tin profeshonalnan na nivel pa duna e servisio ei. Mester enfatisá riba kapasitashon pa hasié bon. I p’esei tambe Curavia t’ei, pa yuda esnan ku a kuminsá den e mundu básiko pero ku ke bai mas leu. I Franklin no ta kere den kompetí ku otro pasobra kada hende tin nan sistema di duna masashi pero mester hasié bon. Futuro di bienestar ta interesante. Hopi turista ta bin aki pa buska e bienestar, pero e pregunta ta si nos ta kla pa  e kantidat di hendenan ei. E vishon di Curavia ta pa krea un plataforma kaminda ku wowo será por bisa serka ken por manda e turista.

 

Mayoria kliente ta strès

 

Strès ta e palabra ku mayoria kliente ta usa ora nan bin serka Franklin. Hopi bes ta e parti abou di e lomba. Serka hende muhé e lomba ariba pero mayoria bia e hendenan ku volúmen ta pone ku nan ta haña doló di lomba. Pero si bo bai e kamindanan korekto bo ta wòrdu yudá. Den e bienestar tin salú mental tambe. Si e persona tin strès asina haltu ku trabou, ora e yega kas yunan ta kore bai bin, e no tin hende pa yud’é òf ora e yega kas tin mama i tata pa kuida i tur hende ta ferwaktu pa e duna 100% pero e persona ei ta kansá. I esei ta un parti ku masashi ta yuda. E manera ku Franklin ta traha ta e parti di rosea pa trankilisá e persona. E tin di relahá i nos ta prepará e kurpa pa traha kuné. Nos ta traha a base di kiko a plania i p’esei ta importante pa papia ku e hende, papia ku e pashènt promé. No ta asina ku e hende ta yega i haña masashi. Den kaso di Franklin, el a profundisá hopi den e parti di energia i e ta konektá ku e persona drumí einan ku mester di yudansa. Si e sinti ku tin kaminda ku e tin di para ketu na dje, e ta hasié i traha kuné. E hende ku nunka a haña masashi no sa kiko e ta pèrdè. Ta traha segun e kurpa i loke e kurpa ta pidi, e ta duna.

 

Tuma un ora pa dia pa ABO

 

Ta dependé di kada ken ku strès, kon e ta yega na dje i kiko e tin di hasi. Bo tin di duna bo mes maske ta un ora ku ta di bo, den e 24 ora ei. Esei ta bo ora di sosegá pa bin bei sino bo ta keda drai konstante i bo ta subi kama drumi i e mente ta trahando ketu bai. E hende tin di kai den e soño di mas profundo i si e no kai den dje, bo no ta lanta bon. I p’esei ser egoista i tuma un ora pa abo i despues di e ora ei bo ta sigui. E hende tin di ‘reset’ meskos ku kisas un telefòn i kòmpiuter.

Konsientisá riba kiko kome

 

Curavia ta bai kuminsá pa duna guia na e parti di komementu. Curavia ke traha den un kadena i ora e persona yega pa yudansa, ta wak kiko e mester i ta konekt’é ku e persona ideal. Si ta kome serka un persona, pa moveshon serka un otro hende, kada persona riba nan kurpa pero ta uní pa Curavia den su totalidat. I ora nos ta papia di dieta i pèrdèmentu di peso, Franklin ta bisa ku si bo tin un rutina i no mantené bo mes na regla, e pèrdida di peso ta enbano. Bo ta pèrdè peso awe pero mañan ta hañ’é bèk. Kualke dieta ku un hende hasi, si e no ta kla p’é i no tin rutina e no ta logra. I p’esei mester kuminsá ku e parti preventivo. Si un hende sa kiko ta kome mihó e ta logra hopi.  Mester hink’é den e hende pa e bira parti di dje.

 

Hinka bienestar den su totalidat den nos hóbennan

 

Franklin a splika ku Curavia ta traha ku skol, organisashonnan i empresanan. El a bisa di ta habrí pa hasi tur kos ku por yuda entre otro kapasitá nos muchanan, duna nan informashon i bon splikashon. El a krea asta un materia pa e muchanan, pa asina nan komprendé. I no solamente pa masashi pero e bienestar den su totalidat. I den e kuadro aki e ta bisa ku nan kada un den nan área ta bon pa duna informashon. No wak otro komo kompetidor pero huntu ta komplementá otro.

 

Futuro di Curavia

 

Franklin a bisa ku pa aki sinku aña Curavia ta un instituto ku ta aportá na gran parti di kapasidat di nos lokalnan den e mundu di masashi i pusha den e mundu di Spa. E ta haña ku si e por pone su granito e por hasié ku mil amor pasobra ta algu ku e ta gusta. Loke ta dun’é satisfakshon ta ku ora e traha ku e persona i despues esaki bis’é kon bon e ta sintié. Asina e ta haña e konfirmashon ku el a hasi su trabou bon. P’e ta importante pa hasi e persona kontentu, pa tin e fórmula pa e keda kontentu i e tin un bida salú. I pa esun ku ke kuminsá un bida salú e ta konsehá pa dokumentá nan mes. Hopi bia ta bai tras di dieta na moda, gym na moda pero buska pa bo mes, kiko bo ke, kon bo ke hasié. Kuminsá wak kiko e kurpa por i tiki tiki ta inkorporá e kosnan segun ta bai.

Festival di bienestar

 

Curavia ta alkansabel riba Facebook “Curavia Wellness” i por yama dirèkt na 6896562 i e ta traha ku sita. Curavia ta situá den Saramacastraat 12. Próksimamente na òktober Curavia ta organisá un Wellness festival. A organisá unu aña pasá tambe. Ta hasié den kombinashon ku otronan pa asina trese e profeshonalnan den bienestar huntu pa públiko ku por mira kiko nan ta hasi. E aña aki e lo ta dia 31 di òktober i 1e di novèmber tambe den PWFC. Einan lo tin un masahista internashonal tambe. Ta bon pa trese konosementu di afó pa konopá ku nos hendenan aki.