Gumbs ta sugirí:
W’STAD/PHILISPBURG.- Minister di Finansa di St. Maarten, Marinka Gumbs ta sugirí pa hasi un evaluashon di e union monetario entre Kòrsou i St. Maarten pa determiná si e ta funshoná manera tabata e intenshon. E minister a hasi su remarke na okashon di desvelo di e florin karibense nobo ku a tuma lugá simultáneamente na Kòrsou i St. Maarten.
Gumbs a hasi un apelashon riba esnan presente pa reflehá riba kiko un union monetario ta nifiká. “Pa ami un union monetario ta nifiká un matrimonio kumbiniente, un matrimonio reglá kaminda e bentahanan pa ámbos pareha ta pisa mas ku e desbentahanan. Ta esaki e gobièrnunan di Kòrsou i St. Maarten a drenta den dje na momento ku a disolvé Antianan Hulandes dia 10 òktober 2010”, Gumbs a bisa.
Na su opinion sigun ku ta sigui kana huntu bai den futuro ku un florin Karibense nobo, kisas mester hasi uso di e oportunidat pa evaluá si e matrimonio di bèrdat ta kumbiniente pa ámbos partner i si e ta funshoná manera tabata e intenshon.
E minister ta splika ku unionnan monetario mester kita tur diskrepansia riba tasa di kambio i gastunan pa kombertí moneda miéntras ku alabes ta redusí gastu. Algu ku e union monetario entre Kòrsou i St. Maarten ta kumpli kuné.
Un union monetario mester fasilitá hasimentu di negoshi di forma transparente usando un moneda komun. Apesar di no sa te kon leu a logra den esaki e minister ta bisa ku e ta sali for di e punto di bista ku esaki ta un di e puntonan positivo ku a logra.
Mas di e metanan di un union monetario ta ku ta kumpli ku reglanan fiskal standardisá i kordinashon di maneho. E punto aki Gumbs ta bisa ku e ta laga na Banko Sentral pa disidí si e ta algu ku ta kumpli kuné.
Mas di e puntonan ku e minister ta mustra riba dje ta fasilitá transakshon entre paisnan miembro, transparensia den preis i posibilidat pa promové kompetensia hustu riba merkado loke mester resultá den produktonan pagabel na benefisio di e konsumidó. “Mi no sa kon mi tin ku evaluá e union monetario riba punto aki.”
Finalmente el a bisa ku e union monetario mester enkurashá negoshi entre paisnan miembro. El a laga na e públiko presente pa nan mes disidí kon nan ta haña ku un union monetario ta presta riba e punto aki.
Personalmente e minister ta di opinion ku pa kualke matrimonio funshoná e mester tin ingredientenan manera : amor, rèspèt, kompromiso, komunikashon i esfuerso mutuo. Den esaki pa e matrimonio ta eksitoso grandura físiko ni grandura di kuentanan bankario no mester konta.
Segun e minister e desaroyonan resien ta ranka na e sentro di e relashon entre Kòrsou i St. Maarten. Ku esaki e minister a referí na e situashon di kompania di seguro Ennia.
“Mi ta kontentu ku huntu nos ta trahando ku rèspèt mutuo , determinashon, komunikashon direkto i amor pa saka e puntonan di doló for di e akuerdo ku tin riba mesa.
Foto:
…Marinka Gumbs…
