WILLEMSTAD.- E sosten temporal di preis adaptá pa kombustibel pa bùs chikitu no ta algu signifikante. Asina presidente di STU, Andres Everitsz, ta indiká den e ‘podcast’ 3or ku Gino.
E montante lo ta ekivalente na 240 liter di kombustibel pa luna, loke ta alrededor di 60 liter pa siman. “E shofùrnan di bùs ku ta kore e ruta di Bándabou ta kaba esaki den 1 dia”, Everitsz ta bisa, pa indiká ku na su opinion e sosten lo no yuda ku mashá. “Den 3 dia ta kima tur e 240 liter.”
Everitsz ta bisa ku Kòrsou su tráfiko ta hopi kongestioná, loke ta okashoná ku ta pèrdè hopi tempu i konsekuentemente gasta mas kombustibel. E loke ku gobièrnu a presentá kuné pa e presidente di STU ta un bòftá den kara di shofùrnan di bùs. E ta di opinion ku un supsidio promé ku a subi gasolin lo a yuda di forma ku no ta nesesario pa subi tarifa di bùs.
Na su opinion mester mira un supsidio i un oumento di tarifa lòs for di otro pasobra nan ta2 kos diferente. “E supsidio ta a base di e preis ku Curoil ta kobra, miéntras ku esaki ta tiki tambe.” Entretantu gobièrnu ta hungando tambe ku e tarifa ku bùsnan chikí ta kobra pasobra, segun Everitsz, ta for di 2017 bùsnan chikí tin derecho riba oumento di tarifa.
Na 2017 shofùrnan di bùs a nenga un oumento di tarifa pasobra situashon di pais tabata hopi malu. Despues e pandemia di Covid a dal aden. “Despues di Covid doñonan di pèrmit di bùs a reuní ku minister di Desaroyo Ekonómiko, Ruisandro Cijntje, ku a bai kana un otro trayekto, pero e dokumento ku el a traha riba dje a keda para despues ku el a baha komo minister.”
Mas aleu Everitsz ta bisa ku e aktual minister, Roderick Middelhof, a biba na República Dominicana i tur loke e ta hasi ta dirigí riba e pais akí, manera eliminá e rekerimentu di visa pa siudadanonan di e pais. Riba e pregunta si shofùrnan di bùs mes a disidí pa subi nan tarifanan tòg, Everitsz ta bisa ku e no ta na altura di esaki. “Loke si por ta probabel ta ku a subi e tarifa ku ta kobra ora ku un pasahero puntra pa desviá for di ruta.”
E loke ku ta kobra pa desviá for di ruta, esta 50 sèn, segun Everitsz, ta tiki i shofùrnan di bùs posiblemente a kuminsá kobra mas pa kumpli ku e petishonnan akí. Tumando na konsiderashon ku mundialmente preis di krudo ta subiendo, konsekuensia di e konflikto ku tin den Medio Oriente, gobièrnu di Kòrsou a anunsiá algun medida pa suavisá e efekto ku esaki tin den komunidat. Minister Charles Cooper (MFK) a duna di konosé ku pa evitá ku preisnan di transporte públiko ta subi i pa garantisá transporte públiko aksesibel pa pueblo, gobièrnu ta duna Autobusbedrijf Curaçao (ABC) un impulso finansiero. Esaki por lo pronto ta pa un periodo di 3 luna.
Tambe gobièrnu ta duna sosten temporal di preis adaptá pa kombustibel pa bùs. Esaki ta un sosten temporal pa mas òf ménos 250 shofùr ku pèrmit.
