EXTRA 50 aña; koleganan ta konta nan eksperensia

 

Mañan djadumingu 1e di mart EXTRA ta selebrá su 50 aniversario. EXTRA a keda fundá dia 1e di mart 1976. Su dos fundadónan Eddy Oleana (qepd) i Mike Oehlers (qepd) a hasi nan soño realidat. Na kabes di e korant komo direktor for di 1e di mart 1976 tabatin Ronald Irausquin (Ronny), kende algun aña pasá a hala un kantu i a laga e maneho kompletamente den man di su yu hòmber Romulo Irausquin. E programa di awe Djasabra nos ta dediká pa djis sera konosí ku algun trahadó i tambe e desaroyo di EXTRA di 50 aña te awe.

Romulo Irausquin; For di kòrta plak pa awe direktor

 

Romulo a praktikamente nasé den e negoshi di korant. Su tata komo akshonista i doño di Beurs & Nieuws Berichten, La Prensa, pero tambe EXTRA a sòru pa for di chikí Romulo tabata envolví den e korantnan. E ta kòrda kon e tabata bai bou di lèsenarnan i a sigui prensa for di e tempu ei. Su privilegio mas grandi ta ku pa mas di 30 aña e por a traha ku su tata diariamente i awor den su tata su malesa, e ta duna bèk na dje. Romulo ta gradesido ku nan por a traha asina tantu aña huntu, sin problema. Ta dos generashon diferente, pero su tata semper a tende su pensamentu i ideanan i a lag’é hasi su kosnan, sin nunka nan pleita i rabia ku otro. “Esaki ta e bunita ku mi ta saka for di mi karera den media/korant”. Romulo ta konta kon na La Prensa e tabata sinta promé dilanti di lèsenar di su tata. E no a yega haña lèsenar pa e traha na dje, pero e mester a sinta na lèsenar ku su tata, despues kòrta kabes i artíkulo i plak esakinan manera tabata sosodé ántes. “Parti di e universidat na Merka, mi a bai e universidat di Ronny  tambe i esei lo keda semper den mi kurason”, asina Romulo ta menshoná.

Koló i digital, e kambionan mas grandi den 50 aña

 

Den e 50 aña di EXTRA pa Romulo e kambio di mas grandi ku el a eksperensiá ta kon a bai over pa koló i digital. E ta kòrda ku ora digital a kuminsá drenta, el a bai profundo den esaki. Na 2012 e mes a skibi un rapòrt pa e akshonistanan pa kuminsá pensa riba digitalisashon. Esei tabata e kambio mas grandi ku por wak i ku ainda ta eksperensiando. Ainda no tin e fórmula kon pa manehá i balansá e parti di e korant imprimí i e korant digital. Awendia ta dos empresa ta manehá, esta e korant imprimí i e parti digital. Den su trayektoria den prensa e parti digital tabata mas grandi. Pero tambe e parti di pasa over di korant pretu ku blanku i bai pa koló. Mester a konvensé akshonistanan, hasi kambionan na ‘drukkerij’ pa por imprimí e korant na koló.

Desaroyo mundial

 

Si kue desaroyo no solamente na Kòrsou, pero tambe internashonalmente, kon e kantidat di korantnan a disparsé, mester bisa ku ta importante pa buska e fórmula pa hende sigui lesa pero alabes tene kuenta ku e situashon na ‘drukkerij’ tambe, kaminda material pa korant ta birando dia pa dia mas karu i skars. “Tin bia nos ta pensa ku un guera na Ukrania, kon esei por afektá nos. Pero el a afektá, pasobra ta di einan tur e plachinan di metal ta bini pa usa den e parti di imprenta di korant. Ora e guera a kuminsá el a influensia e preis. Ántes tabatin masha hopi produkshon di industria di traha papel di korant pero awor ku korantnan imprimí ta birando ménos, ta algun industria a sobra. Ta retonan ku mester sigui lucha ku nan den futuro”. No ta solamente aviso pero eifó tin luchanan fuerte ku tin di enfrentá kuné. Pero ta sigui padilanti pasobra EXTRA ta un soño di Mike i Eddy, i Romulo ta sintié responsabel pa sigui mantené e soño ei. Kon e lo ta aki sinku aña si no tin kontesta pero nos ta sigui lucha pa EXTRA por t’ei 50 aña mas. “Esnan ku a bai nos dilanti a pone e fundeshi pa awe nos por selebrá 50 aña i awe nos tin di sòru pa tene e fundeshi ei fuerte, pa esnan despues di nos tambe por selebrá e 100 aña di EXTRA un dia”.

Ophetividat i kredibilidat

Romulo a sigui poniendo énfasis riba e importansia di ophetividat i kredibilidat di e korant. Ku introdukshon di media sosial i ‘fake news’, e kredibilidat ta importante. E ta bisa ku algun tempu pasá e tabata entrevistá dos hóben pa e parti di media sosial i su pregunta na nan tabata si nan ta lesa korant. Pero ya e por a magin’é e kontesta, esta ku nan no ta lesa korant. Pero nan a bisa si ku ora nan wak un notisia riba media sosial, nan ta subi riba EXTRA pa wak si e notisia ei ta konfirmá. I esei pa Romulo ta dun’é e energia pa sigui, huntu ku henter e tim, ku ora lesa e notisia den EXTRA ta nifiká ku e kredibilidat di e notisia t’ei. Awendia tin yen plataforma sosial, tur hende a bira periodista, pero pa EXTRA ta importante pa keda ku e kredibilidat di notisia.

 

E maneho sosial

 

Romulo a bisa ku e ta purba di tin su maneho a base di kuater pilar. E soño di Mike i Eddy ku a hasi e korant posibel 1e di mart 1976. Hopi a purba pero no a logra pero nan tabatin e fórmula. Tambe e parti di maneho di Ronny, kaminda el a pensa riba futuro i asina a logra yuda hopi den temporada di Covid ku EXTRA tabatin su bon fundeshi. I no mester lubidá Shonma Scoop (qepd) ku semper tabata sali pa e parti sosial. I esei ta loke ku Romulo semper ta purba, esta hiba un maneho sosial, yuda kaminda e por yuda koleganan. “Nos por tin tur kos pero ta e koleganan ta karga e korant diariamente. Nos tin 4 empleado ku ta bai kumpli mas di 40 aña  di servisio, tin 7 kolega ku tin riba 30 aña di servisio i esei ta duna e prueba di kontinuidat di e empresa. E hendenan a keda ku bo. Nos a sòru pa dia Mike Oehlers a fayesé a krea un fondo di penshun chikitu aserka pa e empleadonan. E fondo di penshun akí ta unu ku EXTRA ta kubri kompleto banda di un otro penshun ku tambe tin i ku EXTRA ta kontribuí den dje. Esei mi ta hopi orgaioso di dje. Nos tur ta birando grandi i nos ke ta trankil. Ronny su maneho kon e tabata manehá EXTRA kòrdando riba futuro ta loke mi ta sigui kuné”. Romulo ta enfatisá e parti sosial ku e ta hiba i p’esei na yanüari e empleado por fia sin interes, ta algu pa yuda nan kuminsamentu di aña. Tur esaki pa yuda e empresa i duna bèk na e empleadonan. Pero tambe el a yama danki na tur ku ta kumpra i lesa EXTRA, tambe na e empresarionan ku ta keda kere den EXTRA ku nan avisonan. E pais mester di un media responsabel i ophetivo, el a terminá.

 

 

Esther Bishop i Sin Paulina

 

Den kuadro di selebrashon di 50 aña EXTRA lo tin mas di 50 premio pa nos fiel lektornan. Premionan ku ta varia for di un wega Rei den Mei te na un outo, biahe i estadia den hotèl luhoso. Esther Bishop i Sin Paulina ta e dos atkisitrisnan di aviso di EXTRA ku kada un mas di 40 i 30 aña  di servisio. I nan tambe tabata den Djasabra pa nan konta kon nan a yega EXTRA i nan eksperensia den nan trabou. Esther Bishop tin 43 aña  di eksperensia. El a baha ku penshun i manera el a bisa pa e keda kas laba paña i muha mata, e ta traha. Sin Paulina a kuminsá na 1979 i a keda EXTRA te 1985 i despues a bai i bin bèk na 1991.

For di un ‘tuinhuisje’ pa un edifisio

 

Esther Bishop ta super orgaioso di ta forma parti di EXTRA. Pero hopi kos a kambia. Tempu el a kuminsá tabatin hopi trabou ku e no tabatin ni tempu pa buska yu for di skol. E tabata kore bai bin pa atendé tur kliente pa tene nan kontentu. I ta kòrda kon tabata traha hinka e avisonan den otro, dor di kòrta plak i ku hopi atenshon pa no faya ku preis. Ántes e kliente tabata muchu mas eksigente manera Esther a bisa. Awendia tur kos ta bin kla i via digital nan mes ta hasi e trabou. Ántes ta nan komo trahadó i bendedó di EXTRA tabata hasi e trabou pero awendia e ta bai muchu mas fásil.

Sin Paulina a kuminsá drenta EXTRA ku su mama Auchi (qepd). El a konta ku promé e tabata traha fakansi djòp. Su mama tabata traha ‘Koffie vrouw’ na Beurs en Nieuwsberichten i komo nan ta biba dilanti di Beurs, e tabata bai ku su mama i yud’é, kana su tras. I den fakansi el a bai traha fakansi na Beurs i ora EXTRA a lanta Sin tabata bende korant den EXTRA. E tempu ei EXTRA tabata den un ‘tuinhuisje’. E ‘tuinhuisje’ aki tabata keda djis patras di La Prensa. Den dia tabata usa e ‘Tuinhuisje’ pa atendé asuntunan di EXTRA manera bende korant i  anochi tabata usa e ofisina di La Prensa pa por hasi e trabou di ‘type’ i traha e korant pa mainta. I asina el a sigui saliendo for di bendementu di korant pa atministrashon, despues traha aviso i pa finalmente e ta atkisitris di aviso. Pa mas di 25 aña Sin a traha solamente anochi i awor den dia. El a haña esaki un kambio hopi grandi pasobra el a kustumbrá di no bai fiesta i nada di dibertishon pasobra e tabata gusta loke e ta hasi. E ta drenta 5or di atardi i tin bia te siguiente mainta 5or. Korant e tempu ei tabata yen di aviso ku asta mester a stòp di tuma aviso.

Esther ta kòrda e tempu ei kon ora un ‘fullpage’ drenta e tabata yama Ronny na kas i e tabata haña komo kontesta “ta unda bo ke mi pon’é”. Tempu di Eddy Oleana, e tabata kuminsá traha e korant for di atardi 4or i ta hinka 2 korant den otro pa asina tòg akomodá tantu aviso komo e notisianan ku tabatin. Na momentu ku media sosial a hasi su entrada e parti di avisonan a baha. E hendenan ta pone nan kosnan riba media sosial. Pero apesar di esei mester sigui.

Kampaña 50 aña

 

EXTRA su kampaña ta terminá e wikènt akí. Lo bai tin mas di 50 premio pa hasi klientenan kontentu. Nos hendenan gusta haña premio i p’esei tambe tin e premio grandi ku ta un outo. Promé tabata papia di 50 premio pero esakinan a subi bira mas di 60. Ta saka premionan mañan i ta publiká e ganadónan dia 2 di mart i dia 6 di mart lo tin entrega di premio den patio di EXTRA. Lo saka nòmber di ganadónan i ora nan presentá, nan mes lo saka nan premio. E outo ta bai huntu ku e otro premionan. Lo bai tin ènvelòp ku 3 yabi, un lo gana outo, un lo gana biahe i estadia na Corendon Ulanda i e otro ta gana estadia di dia na Sandals. Ora e tresnan saka e yabi di outo, nan lo partisipá e parti final pa e tres premionan ei.

Banda di e kampaña aki, EXTRA tin vários kampaña mas entre otro PensaGana ku ta esun di mas grandi ku 15 florin na premio. E kampaña ei ta eksistí for di tempu EXTRA a kuminsá. Banda di esaki tin kampaña di tumba i próksimamente tin un kampaña grandi mas na kaminda. I Wega di Number Kòrsou ku tambe ta duna premio tur dia, yegando e máksimo di 5 mil florin.

Orguyoso di ta traha na EXTRA

 

Esther i Sin ta ku penshun kaba pero trahando ketu bai na EXTRA. Miéntras nan tin energia nan lo sigui, asina nan a bisa. Miéntras e kurpa ta duna ta dal bai. Esther a bisa e ta orguyoso di EXTRA, e ta sintié bon trahando na EXTRA, su logronan den bida ta hasié kontentu i felis. I nan no sa keda kas malu i asta ora nan ta malu nan ta bin EXTRA. Ora  nan no tei, ta ku fakansi nan ta. Sin ta sintié orguyoso di traha na EXTRA, el a mira EXTRA for di chikí di nada i krese bira te awe. I trahando ku koleganan ku nan ta sintié ku ta nan famia.

 

 

 

Rilley Ignacio i Lysandra Trinidad (Liesje)

 

Rilley Ignacio (34 aña) i Liesje Trinidad (31 aña) ta otro dos kolega di EXTRA ku mas di 30 aña di servisio na EXTRA. Nan ta konta nan eksperensia enpartikular den kuadro polisial i hudisial. Kiko ta e kos ku ta bin na nan mente mesora ora papia ku nan di EXTRA.

Drenta korte mainta, sali anochi lat

 

Liesje ku su 31 aña a drenta EXTRA riba insistensia di Valesca. E ta kòrda ku Valesca a bis’e pa bai korte i a bai kuné un bia. A bisé ku tur loke pasa den korte e ta skibi i nota. Ántes bo tabata haña e prezunan ta bin gewon ku T-shirt i kisas riba e T-shirt asta arma pinta riba dje. I esei a pone ku e tabata skibié tur kos. E ta kòrda ku e di dos bia Valesca a hib’é korte pero a bis’é ku e ta bai bin bèk i nunka mas a bin bèk den korte kuné. Ta un eksperensia hopi dushi den korte, el a eksperensia hopi kaso i hopi kos pero varia. Liesje a kuminsá na EXTRA den atministrashon. El a bisa ku e no por bisa kiko el a spera di topa, pero bo ta hinka bo mes den e trabou i e tabata algu masha dushi. El a bai korte hopi aña di djaluna pa djabièrnè saliendo su kas for di 8 or di mainta. E ta kòrda den un di e kasonan, wes tabata deliberá ku abogadonan ki ora ta kuminsá un kaso ku mester a dura 2 siman. Dado momentu wes a bisa 9 or i tende a tende den sala YA, i esei tabata el a bisa. Tur hende a hisa kara wak e. Tabatin dia ku ta Valesca tabata yam’e sake for di korte anochi, pasobra kasonan tabata dura basta largu te anochi lat. E tempu ei korant tabata sera 3 or pa 4 or di mardugá i asta ora un kos pasa, mester a para e korant pa e pone loke a sosodé ei den korant.

 

Orguyoso di sa ku bo so tin e notisia

Liesje di su parti hamas ta lubidá di un kaso masha grandi ku ta relashoná ku vários asesinato na Kòrsou. Tabata un trai mèrdia el a bai e kaso i e so a sinti e kaso. E ta kòrda kon fiskal a habri pantaya i mustra di e kasonan. E tabata su so den e kaso. El a yega Kòrsou djasabra ku artíkulonan di e kaso. E ta kòrda ku djadumingu ora el a yega trabou, el a haña mail di un di e sospechosonan mayor ku OM tabata buska. El a manda bisa pa bisa OM ku nan sa masha bon unda ta hañ’e. Liesje ta kòrda ku pa 2 siman largu e no tabata trankil. E tabata sintié menasá i ki ora e ta riba kaya e ta kore wak promé e yega kas, unda ku e bai e tabata wak rònt di dje. E kaso ei sigur a dun’e hopi miedu. Pero loke ta hasi Liesje orguyoso di ta traha na EXTRA ta ora e tin un notisia i e sa ku ta e so tin e. I pa siguiente dia por tende e notisia ei tur kaminda.

 

Rilley for di nasementu den korant

 

Rilley ku su 34 aña na EXTRA a kasi mira e korant lanta, siendo yu di Stanley Ignacio ku ta’tei kasi na nasementu di e korant. Kon bin Rilley a sigui e pasonan di su tata. El a konta nos ku ta un historia ku a kuminsá pa puru kasualidat. E ta kòrda e tempu ei e tabata studiando elèktrishèn i tabata na Merka serka su ruman i einan el a pasa e fotografia básiko einan. Ora el a bin Kòrsou bèk su tata a bisé ku e mester di hende pa yud’e. El a bai yuda su tata pa un temporada pa despues e por sigui hasi su kos ayabanda  asina e par di tempu ei a bira 34 aña.  Rilley tabata sa kiko e trabou ta pasobra el a nase lanta i mir’e. E sa ku bo ta hopi riba kaya, bo ta konosé hopi hende i e trabou ta varia i esei a sòru pa el a keda ei den tambe.

Rilley su promé potrèt

 

Rilley nunka mas ta lubidá ku su promé potrèt tabata na Vèlt Salu, e kaso kaminda a lastra un kolombiano tras di outo, a hinka palu den su kurpa. Tabata e promé kaso ku el a saka i e kurpa di e kolombiano tabata ya den estado di deskomposishon. Te awe e ta mira e figura kla kla. I esei tabata un di su promé potrètnan polisial. No ku ta molesti’é, pero e tabatin impakto den su bida. E tempu ei sakamentu di potrèt tabata otro. I p’esei awor Rilley ta bisa e gainan ku ta kana rònt ku ta ántes tabatin fotógrafo, awor aki ta sakadónan di potrèt tin. Ántes ta manual mester a stèl e kámara i awor e kámara ta bin kla ku e asta ta stèl su mes. Ántes mester a desaroyá e potrètnan den un ‘donkere kamer’. “Imaginá sera bo wowo i no mira nada nada. Ta simplemente habri e kámara i saka e ròl di film for di den dje, hink’é den un spiral drei e, hink’é den un baki i sera. I tur e kosnan ei ta pasa den skuridat total, despues pas’e den diferente proseso i ora neutralisá por sende e los kòrá pa kologá e film. Ta un proseso ku bo mester a hink’é i sa kiko bo ta hasi. Si bo hasi un kos robes ta henter bo trabou bo a daña”. Serka Rilley nunka el a bai saka potrèt lubidando pa hinka ròl di film den dje òf kisas awor aki bai saka potrèt sin chep den e kámara. “Tin dos kos ku mi no ta kere den dje i esei ta sera un yabi den outo i saka potrèt ku kámara sin film òf chep den dje”, Rilley a konta bou di harimentu.

 

Envolví den aksidente pisa

 

Rilley tampoko ta lubidá e aksidente ku el a hañ’e envolví den dje na 2003. El a bisa ku e sa ku el a spanta hopi hende i e ta gradisí Dios ku e tei. Asta dòkternan a bisa ku lo ta difísil pa e bai kana bèk. Pero el a bisa di lo sali hospital kana i ounke e no a sali kaná, su mente a yud’e ku e no ta sinta mas den e ròlstul ei. E aksidente ei a sosodé durante di su trabou. El a sali pista di drag pa bai un aksidente riba viadukto na brùg, kaminda un outo lo a kai i keda kologá den un palu. Hopi hende ta wak e kosnan fásil, Pero djis imaginá bo ta na mundu nobo i tin tiramentu na Santa Rosa. Kon bo ta yega, niun hende por imaginá nan mes di e proseso pa sali for di mundu nobo i yega einan. E tempu ei e ta kòrda ku nan tabata yega promé ku asta polis. “Mi ta bisa mi yunan ku bo tin di pensa pa hende. Bo tin di pensa si e outo a mira bu òf no. I den tur e añanan ei, 34 aña  ta 1 bia el a dal outo. Bo tin di kore pa bo yega pero responsabel”. Esaki pa Rilley ta e parti dushi di e trabou, e ta varia kaminda e no ta topa e mesun hendenan tur dia, e no ta saka e mesun tipo di potrèt tur dia. E ta un tiki asosial tambe tin bia pasobra bo por ta den algu i ta sosodé algu ku bo tin di sali bai.

Topa kara kara ku atrakadó ku arma nikel den man

 

Rilley tabatin diferente potrèt ku a  bai resultá den korte, potrètnan ku a yuda solushoná kasonan. E ta kòrda un atrako na Sta Rosa kaminda helikòpter ta buska ayabanda i e gai a kore sali di e otro banda. Rilley ta bisa ku bo tin di sigui bo instinto. Ora polis tabata buska ayabanda, el a bai e otro banda. E ta kòrda e gai sali for di mondi ku un arma nikel den su man. El a para keda wak Rilley i Rilley a keda wak e despues a gai a sigui kore bai. Rilley a pasa piki e polis hink’é den outo i bai tras di e gai. I asina nan a logra kue e gai skondí. “Ora mi a wak e ku e arma nikel ei den su man, mi ta kere nos tur dos a spanta otro”, Rilley a sigui konta.

 

Hende a bira mas ‘gevoelig’

 

EXTRA tabata e promé media na Kòrsou ku a kuminsá ku e parti digital. Pero promé ku esei e ta kòrda ku tabatin un kaso di tiramentu den Marchena i e víktima a kai muri tras di un frishidèr. A sali ku e kurpa tapá den saku pretu i Rilley a saka su potrèt. Pero no a keda te einan. El a kore bai na e kas mortuario i a logra saka e gai su potrèt morto riba e brankar i na trabou a kòrta e kurpa no tapá i pone riba e brankar ku tabata saliendo for di e sitio di asesinato. Niun hende por  a komprondé kon e kos ei a pasa.

Otro kaso ku e ta kòrda ta tempu ku el a drenta na airopuerto saka un gai ku nan a kue ku droga. Pero saliendo pafó e ta mira un gai pará na su outo i e gai ei nan a kaba di kue ku droga. E gai a pidié pa dun’e un left hib’e Sta Maria pero el a bisé ku e ta bayendo otro direkshon. E tempu ei tabata hasi e kosnan mas kreativo pero awor kos a kambia pasobra hende a bira mas sensibel. Tur kos awor ta molestiá hende.

Den e trabou aki Rilley a haña hopi menasa, el a keda detené tantu bia pa a saka potrèt, pero tur esei ta parti di e trabou. Bo tin di bai e mia èkstra  ei pasobra “Imaginá bu mi yega te Sta Rosa i nan bisa mi mi no por saka  e potrèt ei”.

Pa Liesje i Rilley tur dos tabata drenta kurá di hende i bisa e polisnan ku ta nan famia ke men no por saka nan di einan, i tur esei pa nan por kubri kiko ta pasando.

Mi trabou mi arte

 

Loke ta hasi Rilley orguyoso di ta traha na EXTRA ta ku e por saka potrèt di kalidat i mustra su arte.”Mi ta gusta mi trabou masha hopi mes i e kontakto ku hende. Tin bia hende ta hasi kosnan difísil pero mi ta aseptá. Ounke mi sa ku mi karakter ta poko fèrfelu pero nan ta bisa ku Lora bieu no ta siña papia, ke men na e edat aki lo mi no kambia mas . Mi ta un gai sosial i mi trabou ta pone mi ta sosial”.

 

 

 

Ruseño Sambo

 

E dushi di digital ta ku por midié

 

Ya ta sigur 10 aña ku EXTRA a kuminsá ku videonan riba nos plataforma digital, tantu riba wèpsait, Facebook, Youtube, Instagram i tambe WhatsApp Channel. Nos kolega Ruseño Sambo ta enkargá ku e departamentu aki. El a konta nos di su entrada na EXTRA, komo redaktor polisial, pero ora el a drenta tabata falta un hende pa saka potrèt i Stanley a pidi pa e por a duna un man. Asina el a kuminsá saka potrèt i e mes tabata skibi loke e saka tambe. Ruseño pa 6 aña el a hasi polisial i fotógrafo i despues a bai over pa redakshon final i a pasa over asina pa digital tambe.

Di redaktor lokal, pa saka potrèt i digital

 

Loke pa Ruseño ta bin na su mente mesora ta e adrenalina. Tur dia tin algu, Bo por ta sinta pero algu por sali mesora. E korementu tras di polis, baha for di kaminda pa por a yega. Un kaso ku e no ta lubidá ta un tempu durante di áwaseru un tereno a sak na Seri Kandela. E ta kòrda di mira outonan riba e tereno ku a sak. Nunka el a ferwaktu di mira algu asina i e mester a reportá esaki. E por sali su kas mainta trankil pa bai traha i direpente ta sali algu ku e tin di bai. Ora e kere ku ta algu pa djis yega saka potrèt i bai, ta resultá ku e por keda na e sitio te anochi lat. Esaki ta e kosnan interesante di e trabou, segun el a konta Djasabra.

 

Un desafio

 

“Ora nos a start e departamentu digital, tabata un desafio. A start promé ku e wèpsait pero a disidí di bai hasi mas. E promé produkshon di video tabata un Djasabra. Mi tabata hasi esaki komo hòbi, tuma fakansi bai Merka bai sigui mi kursonan, i ora nos a kuminsá ku e departamentu digital, nos a bai hasi Djasabra un video> e kos ei tabata un eksperensia pasobra tabata un produkshon ku mester a dura mei ora pero a dura mitar dia. Nos a kuminsá ku un studio chikitu pero a keda ekspandé te awor nos tin 2 studio”, Ruseño a konta nos.

Programanan digital di EXTRA

 

El a sigui bisa ku e programa ku tei for di promé dia ta Djasabra, tin 3 or ku Gino ku tambe ta un programa ku a krea, tin kombersando ku Iva, tin Luis Curiel ku su produkshonnan den Bembe. Luis tambe a duna hopi aporte den digital pa kue su ideanan manera inskripshon di tumba i beisbòl i hasi nan digital. Tambe tin Antonieta Dap ku tabata na televishon pero awor ta na EXTRA. I e sifranan ta papia pa nan mes, aki no por gaña i hunga ku sifra. KU tur rèspèt pa televishon tradishonal, nan no por mustra sifra pero EXTRA si por mustra su sifranan di kuantu hende a wak e programa. Esei ta dushi di digital, pasobra bo por midi, wak kua tipo di hende, e edat, demografia. Tin programa sa ku ta hende muhé ta wak nan i tin bo sa ku ta riba Youtube ta haña hende hòmber. E digital ta duna e hèrmènt pa por presentá ku sifra. El a tuma tempu pa eifó mir’e pero segun EXTRA a sigui krese a wak su potensial. Tambe tin e programa di Lupe Reyes aki i tin diferente produkshon mas. Segun Ruseño e produkshon te ainda ku a kue mas ‘view’, tabata e konsierto di Oscar de Leon algun aña pasá (mas di 2 mion view). I tin e produkshon di Becholais ku a dal hopi duru. I tin un kaso di violashon kaminda e yu ta bisa su tata ku e pastor a viol’é.

 

EXTRA tin di bira e ESPN di Kòrsou

 

Un di e kosnan ku ta focus riba dje ta deporte. For di ora a start ku digital un di e ophetivonan tabata pa produsí beisbòl i esei ta un di e proyektonan ku ta kana na EXTRA meskos ku otro deportenan voral esnan ku no tin atenshon riba dje. Na Kòrsou tin beisbòl i futbòl mas popular pero durante di tempu a dediká atenshon na BMX, Natashon i Pasofino. Den futuro lo keda focus riba e parti di deporte. “EXTRA tin di bira e ESPN di Kòrsou”, Ruseño a enfatisá.

Reakshon sin komentario

 

Loke pa Ruseño i Valesca ta masha importante ta ora produsí un programa, i bo haña komentario riba kaya. Tin bia bo ta puntra bo mes si loke bo ta hasiendo ta yega i bo ke balorá bo trabou. Tin bia bo no ta haña komentario pero tòg riba kaya bo ta haña reakshon i esei ta indikashon ku hende ta balorá pero no ta komentá. Kiko e hende ke wak. Esaki ta un tiki difísil pa bisa pasobra nos hendenan ta gusta hari i gusta un tiki ribirishi. EXTRA a skohe pa no drenta e hanchi ei, nos ke entretené pero no drenta den e hanchi di bòmbòshi. Pero por mira ku nos hendenan ke hari i ke entretené. I  e preshon di bida i trabou ta pone ku e hende ke sinta hari un tiki. Si wak e programa di Tony Castro, ta loke e hendenan kier a mira.