Fanátikonan di Extra Inning, bon dia. Nos tei despues di Dia di Pais Kòrsou ku hopi informashon di deportenan Sòftbòl i Beisbòl. Den Beisbòl Dòbel A weganan di djasabra i djadumingu a keda suspendé pa mal estado di tereno. Beisbòl ta den fase final di buèlta regular i na e momentunan aki ku weganan di deskite. Santa Maria a gana Santa Rosa ku skor di 4 pa 1 den nan promé wega. E picher Rubiano Johnakiel Acosta tabata tremendo. Un bon picher derecho ku a hunga vários aña den College na USA i na 2022 a move den Beisbòl di Hulanda i hunga den Quick Amersfoort. Acosta si lo keda ku Santa Maria pa play-off, miéntras e dos pichernan hulandes, Koen Postelmans i Scott Prins a move bèk pa Hulanda pa bai hunga ku selekshon. Prins a tira tremendo, miéntras Postelmans si tabatin un ERA di 8.30. Prins su ERA ta 2.20.
* * * * *
Extra Inning ta manda palabranan di profundo kondolensia pa kasá, yunan i demas famia di Rafael Fernando Jozefa, alias Raffy Jozefa. Sin duda den e tòp 3-nan den tur tempu ku a hunga Beisbòl na Kòrsou i èks Antia. Un rubiano ku a bini Kòrsou na edat hóben i keda biba aki. Raffy Jozefa a fayesé djasabra 8 di òktober. Gran personahe i pelotero. Raffy Josefa a drenta Salon di Fama di ISF, awor FDOK na aña 1994 ku 44 aña.
* * * * *
Liga 50 a sigui djasabra na Van Engelen Ballpark. Ekipo Marlins a pèrdè kontra Jaws 10 pa 3 i despues Flamboyan a gana di Artemisia fásil 12 pa 2. Flamboyan a terminá buèlta regular ku rèkòrt di 7 ganá i 6 pèrdí miéntras Marlins tin 6-6 i falta un wega mas pa terminá kampionato regular. Marlins lo topa ku Artemisia djasabra awor. Pa loke ta trata e seri entre Flamboyan/Tigers i Marlins, Flamboyan a gana den promé buèlta ku skor di 11 pa 9. Den buèlta number 2 ekipo Marlins a gana Flamboyan 13-11. Nos a bai chèk kiko ta pará den regla. Parse ku lòt lo bai disidí ken ta klasifiká, debí ku e dos ekiponan menshoná a keda empatá den tur kos. Ekiponan Baranka 10-2, Jaws 10-2 i Ban Serio 10-3 ya a klasifiká. Catpower tin 5-7 i no tin chèns mas pa klasifiká. Marlins mester gana di Artemisia pa forsa un empate ku ekipo Tigers.
* * * * *
Nos a risibí e notisia ku un gran kècher di tur tempu na Aruba, Cecil Heynes a fayesé. Den aña 70 el a destaká komo kècher den Santa Rosa Indians na Kòrsou un ratu i ekipo Heineken di Aruba. El a aktua komo umpire pa hopi aña tambe. El a fayesé mesun dia ku Raffy Jozefa, esta djasabra 8 di òktober. Kedando na Aruba Jamdrick Cornelia di Wild Cats Hubenil i Sint Michiel a sigui tira tremendo. Na Aruba den e kompetensia di siman pasá el a tira bon. Promé wega ku su tim Sint Michiel a gana ku skor di 3 pa 1 e tabatin no hit no run te den di 4 inning i finalmente Sint Michiel a gana ku skor di 3-1. Den di dos wega el a tira bon atrobe i Sint Michiel a gana 4-2. Den final Sint Michiel a pèrdè, ya sierto picher no tabatin mag di tira riba instrukshon di skout.
* * * * *
Den Liga di Nos Tur, ekipo Sin Stress a zona un kampanaso ganando un wega kontra di Un Kara ku skor di 5 pa 4. Sin Stress a laga Un Kara den tereno den e wega di djasabra ei. Djabièrnè ekipo Un Kara a gana Sin Stress ku skor di 7 pa 6, dos wega pèrtá pèrtá i djabièrnè awor e ganadó di e seri ei lo pasa direktamente pa final. Chilling a eliminá Shining Stars den dos wega ganando 7 pa 3 djabièrnè i 14 pa 8 djasabra. Den Beisbòl Veterano ekipo Santa Rosa Memories a blackout The Brothers 15-0. Santa Maria a gana Jandoret 1-0 den un duelo di picheo entre Johnny Balentina i Raylan ‘Tutu’ Capella. Wega entre Azucar i Yesterday a keda empatá. Nos ta keda te aki pa awe. Te mañan ku Dios ke.
