destino nobo kolombiano pa biaheronan di Karibe Hulandes
WILLEMSTAD.- Di 23 te ku 26 di ougùstùs 2026, Extra lo forma parti di un grupo selektá di representantenan di medio di komunikashon i agensianan di biahe for di Kòrsou, Aruba i Boneiru, ku lo partisipá na un Destination Discovery Trip spesial na La Vega, Cundinamarca, Colombia, biahando via Bogotá.
E biahe di familiarisashon aki ta organisá pa Avianca, Green Oriental Resort i outoridatnan di turismo di La Vega (Cundinamarca), den kolaborashon ku Movich Hotels 26 Bogotá i GBIZ Solutions. Meta ta pa introdusí merkado di Karibe Hulandes na un otro kara di Colombia, un region riku na biodiversidat, kultura, gastronomia i aventura.
Situá den departamento di Cundinamarca i na un distansia fásil di alkansá for di Bogotá, La Vega ta ofresé un alternativa refreskante pa biaheronan karibense ku ke kombiná naturalesa, eksperensianan outéntiko kolombiano i relahashon.
Un di e atrakshonnan di e destino aki pa habitantenan di Kòrsou, Aruba i Boneiru ta su klima agradabel. Pa biaheronan kustumbrá ku kalor di Karibe durante henter aña, La Vega ta brinda un ambiente mas bèrdè i fresku, pero ainda ku temperaturanan konfortabel. Esaki ta hasié un opshon atraktivo pa un eskape kòrtiku for di e islanan.
Durante e biahe di deskubrimentu di kuater dia, e representantenan di medionan di komunikashon i profeshonalnan di turismo lo tin oportunidat di eksperensiá e destino personalmente. Nan lo eksplorá su bunitesa natural i biodiversidat, kultura lokal, gastronomia, hospitalidat i eksperensianan di aventura, i na mes momento deskubrí e posibilidatnan ku La Vega ta ofresé pa futuro biahenan di rekreo for di Kòrsou, Aruba i Boneiru.
E biahe tambe lo pone énfasis riba e konekshon disponibel via Bogotá ku Avianca, komo tambe riba e eksperensia di hospitalidat ku Movich Hotels 26 Bogotá i Green Oriental Resort ta ofresé. Esaki lo duna e partisipantenan un perspektiva mas amplio di kon un estadia na La Vega por forma parti di un ‘itinerario’ di biahe na Colombia.
Pa Extra, e bishita aki ta un oportunidat pa eksperensiá e destino for di perspektiva di e biahero di Karibe Hulandes i kompartí e deskubrimentunan direktamente ku nos lesadónan i siguidónan.
La Vega, Cundinamarca, ta un destino ku mester ta riba radar di biaheronan di Karibe Hulandes? Nos ta bai deskubrí esaki.
Nos ta invitá nos lesadónan i siguidónan pa sigui nos durante e biahe aki via nos korant, wèpsait i kanalnan di media sosial, durante e biahe i den e simannan ku ta sigui, kaminda nos lo kompartí e personanan, sabornan, paisahenan, aventuranan i eksperensianan ku ta hasi e destino kolombiano aki bal la pena pa deskubrí.
Keda pendiente di Extra, tantu den edishon imprimí komo ‘online’, i sigui nos riba nos kanalnan di media sosial miéntras nos ta deskubrí La Vega, Cundinamarca , un Colombia mas aya di loke bo ta spera.
e potrètnan ta duna un bista di e biodiversidat i naturalesa di La Vega
