Danki na tur ku a kooperá
WILLEMSTAD.- Dia 1 di yanüari 2025 tabatin un eksploshon den un kas na Banda Bou. Un kriatura di 11 aña a haña kemaduranan pisá na gran parti di su kurpa. A transporte pa CMC i despues a bai kuné Colombia kaminda el a keda algun luna. Dayson ta bèk na Kòrsou pero e mester di yudansa. Entre otro e mester di paña spesial pa bisti, e mester di baiskel pa bai skol pa e no tin di para muchu den solo warda bùs i nan kas a haña hopi kima i tambe mester di algun muebel.
EXTRA a hasi un kolekta chikí i den un programa ku nos a transmití via digital a duna Dayson e sorpresa aki.
Un di e sorpresanan ta ku Dayson a bisa ku e no ke pasa tiru na kas. Ta nèt riba un dia di tiru di kambio di aña e tragedia ku a lag’e marká. I den e kaso aki Kunuku Aqua Resort a regalá Dayson huntu ku su mama i tata estadia di un anochi pa nan por pasa kambio di aña.
Pastor Chito i su señora Madeline di House of Worship Banda Bou taba’tei pa hasi orashon ku Dayson i nan tambe a regalá un makutu ku komestibel.
Omni ku ta un di EXTRA su klientenan grandi a regalá un sèt di komedor di 6 asiento miéntras ku Building Depot a sòru pa dos kashi paña.
Mister & Miss Exclusive a sòru pa Dayson su trahe pa e por tabata presente den e shou ayera den studio di EXTRA.
Siocha Clothing/Korswill a regalá kèts ku un sèt di paña miéntras ku Dayson por pasa na nan store na Sambil kaminda e lo por haña mas paña.
Van den Tweel Supermarket a regalá e famia 2 voucher na balor di 100 florin kada un pa nan bai hasi kompra.
EXTRA a regalá 500 florin i tres bon amigu a pone 600 florin pa nan por pone koriente ya ku Dayson mester ta den èrko konstantemente.
Dayson su artista faborito ta Tyziano Casseres i el a sorprendé den studio di EXTRA, kantando huntu ku Dayson. Tambe el a regalá Dayson un brel di solo.
I Dayson su deseo tabata un baiskel i esaki el a haña di Vista Bike. Un baiskel Trek el a keda sorprendé kuné.
EXTRA ta gradesí tur ku a kontribuí pa hasi Dayson su fin di aña unu memorabel i tambe danki na Ella Snijders di Slachtofferhulp. Sin su yudansa e programa lo no tabata un éksito.
