WILLEMSTAD.- E dia históriko pa Kòrsou, ta awor un tiki mas serka. Aki 30 dia selekshon nashonal di Kòrsou, lo enfrentá Alemania den su promé partido den un Mundial. Esaki sin duda lo ta un momentu históriko, pa Kòrsou i su futbòl.
Djadumingu 1or di atardi den NRG Stadium na Houston, Kòrsou lo kuminsá skibi su historia den Mundial.
Kòrsou lo topa un Alemania ku ta e gran faborito pa e partido aki, i ku tambe ta un di e tres paisnan pa gana kuater òf mas Kopa Mundial. Nan último título tabata na 2014 na Brasil.
Riba e dia di wega, Kòrsou kompletu lo ta paralisá pa asina mira na promé lugá nan himno toka, sigui despues pa e selekshon nashonal su debut den un Mundial.
Pa hopi hende, yega na un Mundial tabata un soño ku kisas nunka lo a bira un realidat, pero esaki a bira un realidat. Un isla chikí pero ku un kurason grandi pa futbòl, aki 30 dia lo debutá den un Mundial.
E fecha aki lo no ta históriko pa Kòrsou so, pero tambe pa e entrenadó di selekshon nashonal Dick Advocaat. E lo bira e entrenadó di mas edat pa dirigí un partido den Mundial.
