Gerard ta konstatá i reklamá
WILLEMSTAD.- Presidente di Plataforma Bándariba, Elvin Gerard, ta kuestioná otro situashon ku na su punto di bista no ta aseptabel. Ta trata di un kompleho di kas pa grandinan den e bario di Nort Sapaté. Na su opinion, Fundashon Kas Popular (FKP) ta faya ku su obligashon pa hasi mantenshon di e kompleho.
Segun Gerard ta splika, aña pasá a hasi apertura di algun 20 kas pa grandinan na Nort Sapaté. E kasnan ta keda meimei den e proyekto di kas nobo ku a traha den e bario. Ta trata di 10 unidat di 2 kas bou di 1 dak, segun e ta splika.
Gerard ta mustra ku FKP ta e instansia ku mester hasi mantenshon di e kasnan i e kompleho. Pero, esaki no ta tuma lugá. Meimei di e tereno a traha un ‘gazebo’ kaminda e grandinan por sinta atardi den aire liber, pero bou di un dak. Esaki komo un forma di rekreashon i posibilidat pa sosialisá ku otro.
Pero, segun Gerard ta bisa, loke e por a tuma nota di dje ku su mes wowonan, ta mustra ku e mantenshon ta laga hopi di deseá. Yerba a krese riba e tereno kompletu i rondó di e ‘gazebo’. Bou di e dak ta hopi shushi tambe ku eskremento di bestia manera, palomba, djaka i raton, i asta tin bestia morto Gerard ta bisa. E ta hasi un yamada urgente riba FKP pa kumpli ku mantenshon di e kompleho.
E ta mustra ku e grandinan tambe ke sinta wak weganan di Kopa Mundial bou di e ‘gazebo’. Na su opinion, si FKP kòrta den algun ora di konsùltentnan ku ta traha pa e fundashon, ya kaba ta skapa sufisiente sèn pa asina paga pa limpia e tereno. Mas aleu e ta bisa ku anekso na e kompleho di kas pa grandinan tin alabes un kompleho di SGR-Groep spesial pa hendenan ku desabilidat.
“E shushedat akí ta molèster pa e klientenan di SGR-Groep tambe. “FKP mester hasi algu na limpiesa i mantenshon pa evitá ku e problema ta bira mas grandi i kousa mas tantu molèster ainda. Tambe pa e grandinan por disfrutá di e weganan di Kopa Mundial ku ta kuminsá otro luna.”
EXTRA a purba di drenta den kontakto ku direktor di FKP, Arthur Con, pa un reakshon. Lamentablemente no a logra di establesé kontakto ku e direktor.
