Siudadanonan di Utah a tene un vigilia den Orem City Center Park, na Orem, un dia despues dje asesinato di Charlie Kirck na Utah Valley University.
OREM, Merka (AFP).- Outoridatnan di Merka a anunsiá ayera di a detené e persona ku nan ta kere a tira i mata Charlie Kirk, un aktivista di derecha i aliado serkano dje presidente Donald Trump.
Outoridatnan tin komo sospechoso, Tyler Robinson di 22 aña. El a keda arestá den St. George, Utah, na 250 km dje siudat di Orem, kaminda Kirk a keda tirá djaweps miéntras ku e tabata papia dilanti di un multitut na Utah Valley University. Forsanan di seguridat a bisa ku su famia a yuda pa entreg’é despues ku el a bisa nan ku e t’esun ku a tira Kirk.
Segun outoridatnan e atakante a usa un rifel di gran potensia i a tira for di riba dak di un edifisio na un distansia di 185 meter for di su ophetivo.
Kirk tabata un héroe pa derechistanan i a yuda Trump pa konstruí un fanatikada hubenil enorme pa su viktoria den elekshonnan presidensial di novèmber último. Tambe e tabata un figura ku ta trese hopi divishon ku su opinionnan radikal riba rasa, género i poseshon di arma. Sinembargo, hopi di inkluso su krítikonan tabata elogi’é pa su disponibilidat pa debate.
Kirk tabata duna konferensia ora ku el a bishitá e universidat di Utah. Outoridatnan te ku ayera tardi no tabata sa e motibu dje atake. E supuesto tiradó no tabata un studiante dje universidat.
E pistanan dje motibu por ta skirbí riba e kashinan di bala ku a haña na esena dje krímen. Un kartucha tabatin skirbí “Hei, fasista. Fangu esaki!”, segun e gobernador di Utah, Spencer Cox. Otro kartuchanan tabata bisa ‘Bella ciao’, aparentemente un referensia na un kansion anti fasista italiano dje époka di Segunda Guera Mundial. Otro kartuchanan tabata marká ku símbolonan i palabranan ku parse ta bini di e kultura di ‘videogames’.
Merka durante di último dékada a registrá vários tiroteo i atake pa motibunan polítiko, inkluyendo dos intento di asesinato riba Donald Trump, durante kampaña elektoral di 2024.
Kirk ta keda tratá komo un héroe nashonal pa e gobièrnu di Trump, ku lo otorg’é e mayor honor sivil di Merka, ku ta Medaya di Libertat. E kaha di Kirk a keda transportá pa su siudat natal Phoenix den e avion ofisial dje vise-presidente JD Vance.
I
