Ayera famia di prezunan polítiko na Venezuela a tene akshon dilanti di embahada norteamerikano na Caracas. Nan ke pa Merka intervení pa liberá na famianan.
CARACAS, Venezuela (AFP).- Ayera famia di prezunan polítiko na Venezuela a eksigí e mediashon di parti di Merka pa liberashon di nan sernan kerí. Nan a hasi esei den un kampamentu instalá dilanti e embahada norteamerikano na Caracas.
Delcy Rodriguez, kende a asumí e presidensia interino di Venezuela na luna di febrüari, despues di kaptura di Nicolas Maduro den un operashon norteamerikano na yanüari, a promové un lei di amnistia. Pero segun e organisashon Foro Penal ainda tin 400 prezu polítiko den e pais.
E famianan a posishoná nan mes dilanti di embahada norteamerikano konsiderando ku Venezuela ta bou di tutela di Washington. “Nos no ta bai for di aki sino te ora e persona enkargá, e merikano John Barrett, hasi e mediashon ku gobièrnu i entregá nos sernan kerí”, segun Francis Quiñones (52) mama di persona ku den 2020 a forma parti di un grupo ku kier a derotá Maduro. Outoridatnan venezolano “a gaña nos, pero awor nos ke kontesta”, segun Mayra Morales, ku ta ruman di un otro detenido.
E hefe di seguridat di e embahada a informá nan di a pasa nan demandanan pa su superior. “El a pidi pa nos tene pasenshi ya ku e kontesta por bin “den algun ora” pero tambe “den un pa dos siman”.
Ta konosí ku outoridatnan venezolano a trasladá kantidat grandi di detenido ku tabata den e prizòn El Helicoide, na Caracas, pa otro prizònnan rònt e pais.
