Rei Oyo Nyimba Kabamba Iguru Rukidi IV di Uganda, kende a muri na edat di 31 aña.
KAMALA, Uganda (AFP)- E mama di e rei tradishonal di Uganda, Oyo Nyimba Kabambam, kende ta Oyo Nyimba Kabamba Iguru Rukidi IV, ku a muri luna pasá, a bisa ku e ta será kontra su boluntat den palasio huntu ku otro miembronan di famia real debí na un disputa ken mester bira rei.
E rei Oyo, kende a subi trono na tres aña di edat, a goberná reino di Tooro, Uganda, durante di 31 aña. El a muri miéntras e tabata na Merka pa risibí tratamentu kontra di kanser. Guinness World Records a rekonos’é komo e monarka reinante mas hóben na mundu.
Uganda ta un repúblika, pero ofisialmente a rekonosé e reinan tradishonal, kendenan ta aktua prinsipalmente komo institushonnan kultural i tin un poder polítiko limitá.
Ayera, un komité di selekshon dje famia real Babiito a anunsiá ku e prens, Edward Rukidi Kijanangoma, a keda eligí pa sinta komo e rei nobo. E desishon a keda rechasá di parti dje prensès, Ruth Komuntale, ruman di e rei ku a fayesé, akusando “paranan malbado” di ta konspirá kontra di su persona i e Mama Reina.
E prensès a presentá un tèstamènt ku, segun el a bisa, a keda redaktá pa e rei den 2022 i den kua e propio rei ta designá “un yu biológiko” komo heredero, sin revelá nòmber. Esei a kue e famia élite di Tooro di sorpresa, komo ku nunka nan a tend’é papia di e yu i komo tal a ekskluí su persona for di votashon.
“Un rei no por drumi ku un prostituta riba kaya òf ku un kriá, haña yu i despues dun’é trono”, segun Andrew Mwenda, figura poderoso di Uganda i originá di Tooro. “Esei no kier men ku Oyo a hasi algu asina”.
Djaweps, e Reina Mama, Best Kemigisa, a emití un komunikado den kua e ta bisa ku trupanan a “retirá e guardia real sin previo aviso i a pone otronan rondó dje palasio. Nos no por sali libremente. Nos ta bou di aresto di kas”, segun el a denunsiá.
Afrika ta konta ku solamente tres monarkia soberano, kualnan ta Esuatini, Lesito i Marruekos, miéntras ku vários pais ta rekonosé reinonan tradishonal komo institushon kultural sin poder polítiko.
Entiero dje hóben rei di Uganda, kende a fayesé na Merka kaminda el a bai pa tratamentu kontra di kanser.
