CARACAS, Venezuela (AFP).- Un sentenar di manifestante ayera a entregá un karta na outoridatnan na palasio presidensial Miraflores na Caracas, ku ta algu no usual pa disidentenan na Venezuela., Durante di añanan di chavismo gobièrnu a sa di reprimí i impedí protestanan den sentro di Caracas, i pió ainda serka di e sede presidensial. Pero ayera, famianan di prezunan polítiko a marcha yega te serka dje sede di gobièrnu i a reklamá e presidente interino, Delcy Rodriguez, pa e echo ku e no ta kumpli ku liberashon di prezunan polítiko.
Margareth Baduel, yu dje general Raúl Isaias Baduel kende tabata minister di defensa di Hugo Chavez, a muri den prizòn den 2021, a splika ku nan ker a hasi “entrega di un dokumento na e presidente enkargá, mas ainda teniendo kuenta ku e mes a hasi anunsionan di liberashon ku kua no a kumpli”.
Su ruman Josnars Baduelo ta kumpli ku un kondena di 30 aña, akusá di traishon di patria i terorismo. E grupo a marcha te yega na un barikada polisial enorme ku a impedí ku nan por a drenta e palasio di Miraflores.
Dos representante di Komité di Libertat di Prezunan Polítiko a keda atendé pa un delegashon dje ofisina di presidensia i a risibí e dokumento. “Delcy, si bo ta bai dialogá, kuminsá na liberá”, segun e manifestantenan tabata grita.
E marcha a tuma lugá algun dia promé ku e di dos buèlta di negosiashon entre e gobièrnu interino i un sektor di oposishon ku e meta pa yega na un transishon demokrátiko. Den kuadro dje promé buèlta, gobièrnu a primintí ku 131 prezu lo sali for di prizòn, pero segun organisashonnan sosial a konfirmá solamente 80 a keda liberá.
Delcy Rodriguez a asumí poder den luna di yanüari despues dje kaida di Nicolás Maduro den un operashon militar di Merka. Bou preshon di Merka, el a promové un lei di amnistia, ku, segun el a bisa, a permití pa 1.046 prezu polítiko por a haña nan libertat. Sinembargo, e organisashon di derechinan humano ONG Foro Penal ta sigurá ku ainda tin 300 persona detené.
